საპატრიარქოში სინოდის სხდომა, რომელზეც პატრიარქობის 3 კანდიდატი უნდა შეერჩიათ, დასრულდა. საპატრიარქოს საზოგადოებასთან ურთიერთობის სამსახურის ხელმძღვანელმა დეკანოზმა, ანდრია ჯაღმაიძემ ჟურნალისტებთან საუბრისას განაცხადა, რომ სინოდის წევრებმა კანდიდატებად მოსაყდრე შიო (მუჯირი), მეუფე იობი (აქიაშვილი) და მეუფე გრიგოლი (ბერბიჭაშვილი) აირჩიეს. მისი განმარტებით, ხმათა უმრავლესობა (20 ხმა) მოსაყდრე შიომ, ხოლო დანარჩენმა ორმა კანდიდატმა 7-7 ხმა მიიღეს.

დეკანოზი ანდრია ჯაღმაიძის განცხადებით, კანდიდატებად ასევე დასახელდნენ, თუმცა ხმათა უმრავლესობა ვერ მოაგროვეს მეუფე გრიგოლ კაციამ, მეუფე დოსითეოსმა და მეუფე მელქისედეკმა. დეკანოზმა ასევე განმარტა, რომ ასაკთან დაკავშირებით ცვლილება არ მიუღიათ და სინოდმა მართვა-გამგეობის დებულებაში არსებული ჩანაწერებით იხელმძღვანელა.

"სამი კანდიდატი იქნა გამორჩეული. ეს სამი კანდიდატი არის მოსაყდრე შიო (მუჯირი), მეუფე იობი (აქიაშვილი), მეუფე გრიგოლი (ბერბიჭაშვილი). მოგეხსენებათ, რომ შემდგომში ამ სამ კანდიდატს შორის კენჭისყრა შედგება გაფართოებულ სხდომაზე, სადაც კენჭისყრის შედეგი უკვე გვაჩვენებს ვინ იქნება მომავალი პატრიარქი. თარიღი არ არის ჯერ ცნობილი.

საპატრიარქო ტახტის მოსაყდრემ მიიღო 20 ხმა. დანარჩენმა ორმა კანდიდატმა მიიღო 7-7 ხმა. [ასევე დასახელებულ კანდიდატებს შორის] იყვნენ მეუფე გრიგოლ კაცია, მეუფე დოსითეოსი და მეუფე მელქისედეკი.

დღევანდელ სხდომაზე მთავარი, პრინციპული საკითხი, რაც, აი, ამ თემებს გადაწყვეტდა იყო ის, რომ მართვა-გამგეობის დებულებაში არსებული ჩანაწერები შესრულებულიყო ზედმიწევნით. ასე, რომ ამის მიხედვით იხელმძღვანელა სინოდმა", — განაცხადა დეკანოზმა ჯაღმაიძემ.

შეგახსენებთ, დღეს საპატრიარქოში 12:00 საათზე სინოდის სხდომა იყო ჩანიშნული.

შეგახსენებთ, რომ ეკლესიის მართვა-გამგეობის დებულების თანახმად, პატრიარქის გარდაცვალების ან გადადგომის შემთხვევაში, ახალი წინამძღოლის არჩევა შეზღუდულ ვადებში, პატრიარქის გარდაცვალებიდან 40 დღის შემდეგ, არაუგვიანეს 2 თვეში უნდა განხორციელდეს.