პარლამენტმა პლენარულ სხდომაზე დღეს ახალი კანონი მიიღო, რომელიც სპეცუბნების შექმნას კრძალავს შსს-ს, თავდაცვის სამინისტროს, სასჯელაღსრულებისა და პრობაციის სამინისტროს, სახელმწიფო უსაფრთხოებისა და დაზვერვის სამსახურების, ასევე სახელმწიფო დაცვის სპეციალური სამსახურის ქვედანაყოფების ტერიტორიაზე.

კანონპროექტის ავტორი საქართველოს მთავრობა იყო. კანონპროექტის მიღების მომხრე 80 დეპუტატი იყო, წინააღმდეგი კი - არცერთი.

კანონი არეგულირებს ისეთ გამონაკლის შემთხვევებსაც, როგორიცაა საარჩევნო უბნის შექმნა პენიტენციურ დაწესებულებებში, სათნოების სახლში, საავადმყოფოებში და სხვა.

ცვლილების მიხედვით, პარლამენტის მაჟორიტარული სისტემით ჩატარებულ არჩევნებში შესაბამის საარჩევნო ოლქში მონაწილეობას მიიღებს ის სამხედრო მოსამსახურე, რომელიც არჩევნების დღისათვის 1 წლით ან 1 წელზე მეტი ვადით განთავსებულია დისლოკაციის ადგილზე, ან თუ იგი ადგილსამყოფელს იცვლის ერთი და იმავე საარჩევნო ოლქის ტერიტორიაზე.

სპეციალური საარჩევნო უბნების გაუქმების შესახებ თინა ხიდაშელმა 20 აპრილსაც განაცხადა.