3 მაისს, პრესის თავისუფლების მსოფლიო დღესთან დაკავშირებით, "საფრანგეთის საელჩო საქართველოში" სოციალურ ქსელში განცხადებას ავრცელებს.

საელჩო მხარდაჭერას უცხადებს ყველა ქართველ ჟურნალისტს, რომლებიც, განსხვავებული პოლიტიკური შეხედულებების მიუხედავად, პროფესიულ მოვალეობას დიდი პასუხისმგებლობით ასრულებენ.

"ვინაიდან მოქალაქეებისთვის სანდო ინფორმაციის გარეშე დემოკრატია შეუძლებელია,

ვინაიდან ხარისხიანი ინფორმაცია მწირი და მყიფე გახდა იმ დროს, როდესაც პროპაგანდა და პოლიტიკური მარკეტინგი ზოგჯერ მარტივი ჭეშმარიტების ძიებას ახშობს,

საფრანგეთის საელჩოს საქართველოში, პრესის თავისუფლების მსოფლიო დღეს, 3 მაისს, სურს, მხარდაჭერა დაუდასტუროს ყველა ქართველ ჟურნალისტს, რომლებიც, პოლიტიკური შეხედულებების მიუხედავად, თავიანთ საქმიანობას ასრულებენ გულმოდგინედ და გაბედულად, საზოგადოებრივი განხილვის გაშუქების მიზნით," — წერს საფრანგეთის საელჩო.

ამასთან, განცხადებაში ხაზგასმულია, რომ საჯარო ხელისუფლების პასუხისმგებლობაა ისეთი პოლიტიკური და სამართლებრივი გარემოს შექმნა, სადაც ჟურნალისტებს შესაძლებლობა მიეცემათ — თავისუფლად გამოხატონ საკუთარი აზრი და სრულფასოვნად შეასრულონ თავიანთი როლი დემოკრატიული პროცესების განმტკიცებაში.

"საჯარო ხელისუფლების პასუხისმგებლობაა ყველგან, შექმნას ისეთი პოლიტიკური და პრაქტიკული სამართლებრივი პირობები, რომელშიც შესაძლებელი იქნება ჟურნალისტების გამოხატვის აუცილებელი თავისუფლების განხორციელება," — აღნიშნავს საელჩო.

შეგახსენებთ, 3 მაისს მსოფლიო პრესის თავისუფლების დღეა.
ამასთან დაკავშირებით, მედიის განვითარების ფონდმა (MDF) და "მითების დეტექტორმა" გამოაქვეყნეს ანგარიში, რომელიც 2025 წელსა და 2026 წლის იანვარ-აპრილში მედიისა და ჟურნალისტების წინააღმდეგ მიმართულ დეზინფორმაციული და დისკრედიტაციის კამპანიების ტენდენციებს აჯამებს.

მეტი მსოფლიო პრესის თავისუფლების დღესთან დაკავშირებით: