მსოფლიო ლიდერები კვირას სომხეთში, ერევანში ევროპული პოლიტიკური გაერთიანების მე-8 სამიტზე დასასწრებად ჩავიდნენ. შეხვედრის დევიზია "მომავლის შენება: ერთიანობა და სტაბილურობა ევროპაში" იმართება.

48 ქვეყნის ლიდერი, მათ შორის ევროკავშირის 27 წევრი ქვეყნის წარმომადგენელი, დღეს, 4 მაისს, შეიკრიბება, რათა მნიშვნელოვანი პოლიტიკური საკითხები, მათ შორის აშშ-ირანის დაძაბულობა, პირისპირ განიხილონ.

France 24 წერს, რომ აღნიშნულ შეხვედრაზე აშშ-ის პრეზიდენტ დონალდ ტრამპის ფაქტორი ცენტრალური იქნება. სამიტი ერევანში, რუსეთსა და ახლო აღმოსავლეთს შორის გზაჯვარედინზე იმართება.

"კონტინენტის ლიდერები, კანადასთან, როგორც სტუმართან ერთად, იმსჯელებენ იმაზე, თუ როგორ ითანამშრომლონ უსაფრთხოებისა და კოლექტიური მდგრადობის გასაძლიერებლად", — დაწერა სოციალურ ქსელში ევროპული საბჭოს პრეზიდენტმა ანტონიუ კოშტამ, როდესაც ის სომხეთის დედაქალაქში ჩავიდა.

ერევანში ასევე იმყოფებიან უკრაინის პრეზიდენტი ვოლოდიმირ ზელენსკი და NATO-ს გენერალური მდივანი მარკ რუტე, ხოლო მერცის ინტერესებს საფრანგეთის პრეზიდენტი ემანუელ მაკრონი წარადგენს.

მათ შეუერთდებათ კანადის პრემიერმინისტრი მარკ კარნი — პირველი არაევროპელი ლიდერი, რომელიც EPC-ის მოლაპარაკებებში მონაწილეობს. France 24 წერს, რომ ეს არის ოტავასა და ევროპას შორის იმ მზარდი დაახლოების ნიშანი, რომელიც ტრამპის პოლიტიკამ გამოიწვია.

აშშ-ზე დამოკიდებულების შესამცირებლად, ოტავა ევროკავშირის თავდაცვის დაფინანსების სქემას შეუერთდა და ცდილობს გააღრმაოს თანამშრომლობა სავაჭრო სფეროში.

EPC-ის ფორუმზე დასასწრებად ჩავიდა საფრანგეთის პრეზიდენტი, ემანუელ მაკრონი ერევანში ჩავიდა. ის გუშინ, 3 მაისს სომხეთის პრემიერმინისტრს, ნიკოლ ფაშინიანს შეხვდა. მათ ერევანი ერთად დაათვალიერეს.

სომხეთში ევროპული პოლიტიკური გაერთიანების მე-8 სამიტში მონაწილეობს ირაკლი კობახიძეც, რომელიც მრგვალი მაგიდის ფორმატის დისკუსიაზე სიტყვით გამოვა. აღნიშNული მრგვალი მაგიდის მთავარი თემა დაკავშირებადობის გაძლიერება და ეკონომიკური უსაფრთხოებაა.

როგორ კობახიძემ ჟურნალისტებს განუცხადა, მრგვალი მაგიდის ფორმატში ექნება საშუალება, მიმართოს ევროპელ ლიდერებს და ამ ღონისძიებას ორმხრივი შეხვედრებისთვისაც გამოიყენებს.

"ევროპული პოლიტიკური საზოგადოების სამიტში პირადად მე მეხუთედ ვმონაწილეობ. მრგვალი მაგიდის ფორმატში მექნება საშუალება, მივმართო ევროპელ ლიდერებს, ორმხრივი შეხვედრებისთვისაც გამოვიყენებთ ამ ღონისძიებას. ზოგადად, ამიერკავკასიის და საქართველოს როლი არის განსაკუთრებული. ჩვენ შვიდ ქვეყანას ვაკავშირებთ შავ ზღვასთან და შესაბამისად — დასავლეთთან, ეკონომიკური და სავაჭრო კუთხით და ბუნებრივია, ამაზე გვექნება აქტიურად საუბარი. საქართველოს აქვს ძალიან დიდი მნიშვნელობა დაკავშირებადობის თვალსაზრისით ევროპისთვის", — განაცხადა ირაკლი კობახიძემ.

ცნობისთვის, EPC-ის ფორუმს დაესწრებიან ლიდერები ევროკავშირის 27 წევრი სახელმწიფოდან, აგრეთვე ალბანეთიდან, ანდორიდან, სომხეთიდან, აზერბაიჯანიდან, ბოსნია და ჰერცეგოვინიდან, კანადიდან, საქართველოდან, ისლანდიიდან, კოსოვოდან, ლიხტენშტაინიდან, მოლდოვიდან, მონაკოდან, მონტენეგროდან, ჩრდილოეთ მაკედონიიდან, ნორვეგიიდან, სან-მარინოდან, სერბეთიდან, შვეიცარიიდან, თურქეთიდან, უკრაინიდან და გაერთიანებული სამეფოდან.

შეგახსენებთ, ევროპული პოლიტიკური გაერთიანება (EPC) არის სამთავრობოთაშორისო ფორუმი ევროპის მომავლის შესახებ პოლიტიკური და სტრატეგიული დისკუსიებისთვის, რომელიც 2022 წელს, უკრაინაში რუსეთის სრულმასშტაბიანი შეჭრის შემდეგ დაარსდა.