ირაკლი კობახიძე სომხეთში ევროპული პოლიტიკური გაერთიანების მე-8 სამიტში მონაწილეობს. დღეს, 4 მაისს, ის სიტყვით გამოვა მრგვალი მაგიდის ფორმატის დისკუსიაზე, რომლის მთავარი თემაა დაკავშირებადობის გაძლიერება და ეკონომიკური უსაფრთხოება.

როგორ კობახიძემ ჟურნალისტებს განუცხადა, მრგვალი მაგიდის ფორმატში ექნება საშუალება, მიმართოს ევროპელ ლიდერებს და ამ ღონისძიებას ორმხრივი შეხვედრებისთვისაც გამოიყენებს.

"ევროპული პოლიტიკური საზოგადოების სამიტში პირადად მე მეხუთედ ვმონაწილეობ. მრგვალი მაგიდის ფორმატში მექნება საშუალება, მივმართო ევროპელ ლიდერებს, ორმხრივი შეხვედრებისთვისაც გამოვიყენებთ ამ ღონისძიებას. ზოგადად, ამიერკავკასიის და საქართველოს როლი არის განსაკუთრებული. ჩვენ შვიდ ქვეყანას ვაკავშირებთ შავ ზღვასთან და შესაბამისად — დასავლეთთან, ეკონომიკური და სავაჭრო კუთხით და ბუნებრივია, ამაზე გვექნება აქტიურად საუბარი. საქართველოს აქვს ძალიან დიდი მნიშვნელობა დაკავშირებადობის თვალსაზრისით ევროპისთვის", — განაცხადა ირაკლი კობახიძემ.

მთავრობის ადმისნიტრაციის ცნობით, ირაკლი კობახიძე, სხვადასხვა ქვეყნის ლიდერებთან ერთად, ასევე მონაწილეობას მიიღებს ნარკოტიკების წინააღმდეგ ევროპული კოალიციის (ECAD) მეორე შეხვედრაში.