ვენეციის 61-ე ბიენალეს საერთაშორისო ჟიური სრული შემადგენლობით გადადგა, ნათქვამია გამოფენის ოფიციალურ ვებსაიტზე ხუთშაბათს, 30 აპრილს გამოქვეყნებულ განცხადებაში. გადადგომის მიზეზები არ დაკონკრეტებულა. ჟიურის თავმჯდომარე ბრაზილიელი კურატორი სოლანჟ ფარკაში იყო.

გადადგომა მოხდა ჟიურის გადაწყვეტილებიდან ერთ კვირაზე ნაკლებ დროში, მას შემდეგ რაც მათ განაცხადეს, რომ არ განიხილავდნენ ჯილდოს კანდიდატებად იმ ქვეყნების ნამუშევრებს, რომელთა ლიდერებს საერთაშორისო სისხლის სამართლის სასამართლომ (ICC) კაცობრიობის წინააღმდეგ ჩადენილ დანაშაულებში დასდო ბრალი.

ამით, ფაქტობრივად, რუსეთი და ისრაელი კონკურსიდან გამოითიშა. ისრაელელმა მოქანდაკე ბელო სიმიონ ფაინარუმ ჟიური რასობრივ დისკრიმინაციაში დაადანაშაულა და სამართლებრივი ზომებით დაიმუქრა.

ბიენალეს ადმინისტრაციამ თავი შეიკავა ჟიურის კრიტიკისგან, ხაზი გაუსვა მის დამოუკიდებლობას და საკომპენსაციო ზომები გამოაცხადა. გამოფენის ისტორიაში პირველად, ვიზიტორებს მიეცემათ შესაძლებლობა აირჩიონ თავიანთი საყვარელი მხატვრები, მათ შორის რუსეთის და ისრაელის პავილიონებიდან. დაჯილდოების ცერემონია მაისიდან ნოემბრამდე გადაიდო.

ბიენალეს ორგანიზატორები იტალიის მთავრობისა და ევროკომისიის კრიტიკის ქარცეცხლში ჯერ კიდევ მარტში გაეხვნენ, მას შემდეგ, რაც განაცხადეს, რომ რუსეთი უკრაინის წინააღმდეგ ომის დაწყების შემდეგ გამოფენაზე დაბრუნდებოდა. ვენეციის 61-ე ბიენალეს გახსნა 9 მაისს არის დაგეგმილი.

20 აპრილს ევროკავშირის საგარეო პოლიტიკის ხელმძღვანელმა, კაია კალასმა განაცხადა, რომ ბიენალეზე რუსეთის დაშვების გამო, ბლოკი გეგმავს, რომ ვენეციის ბიენალეს დაფინანსების შეუწყვიტოს.