აშშ-ის პრეზიდენტმა, დონალდ ტრამპმა განაცხადა, რომ არ ნერვიულობდა თეთრი სახლის კორესპონდენტთა ვახშმიდან ევაკუაციის დროს, რომელიც შეიარაღებული პირის მიერ დარბაზში შეჭრის მცდელობას მოჰყვა.

"არ ვნერვიულობდი. მე მესმის ცხოვრების აზრი. ჩვენ გიჟურ სამყაროში ვცხოვრობთ", — განაცხადა ტრამპმა CBS News-ის გადაცემაში "60 წუთი"

ამერიკულმა მედიამ ეჭვმიტანილის ვინაობა დაასახელა — ის 31 წლის კოულ თომას ალენია. პოლიციის ინფორმაციით, ალენი მას შემდეგ დააკავეს, რაც მან ღონისძიების უსაფრთხოების გამშვებ პუნქტთან ცეცხლი გახსნა. ის სასამართლოს წინაშე ორშაბათს წარდგება. საქმეს გამოძიების ფედერალური ბიურო (FBI) და ტერორიზმთან ბრძოლის ჯგუფი იძიებენ.

აშშ-ის გენერალურმა პროკურორმა, ტოდ ბლანშმა აღნიშნა, რომ წინასწარი ინფორმაციით, სავარაუდოდ, ეჭვმიტანილის სამიზნე ვახშამზე მყოფი ტრამპის ადმინისტრაციის წევრები იყვნენ. თავდასხმის დროს ტრამპთან ერთად იმყოფებოდნენ ვიცე-პრეზიდენტი ჯეი დი ვენსი, ჯანდაცვის მინისტრი რობერტ კენედი უმცროსი, თეთრი სახლის პრესსპიკერი კაროლინ ლივიტი და მრჩეველი სტივენ მილერი.

"ვერ წარმომიდგენია სხვა პროფესია, რომელიც ამაზე სახიფათოა", — განაცხადა ტრამპმა უსაფრთხო ადგილას გადაყვანის შემდეგ, ბრიფინგზე.

კვირას გავრცელებულ განცხადებაში, თეთრმა სახლმა აღნიშნა, რომ პრეზიდენტი უშიშრად დგას მას შემდეგ, რაც კაბინეტის წევრებთან ერთად მკვლელობის მცდელობას გადაურჩა.

თეთრი სახლის კორესპონდენტთა ასოციაციის პრეზიდენტმა, ვეიჯია ჯიანგმა, მომხდარს შემაძრწუნებელი უწოდა.

კვირას, Fox News-თან ინტერვიუში ტრამპმა აღნიშნა, რომ ეჭვმიტანილს "გულში დიდი ხნის განმავლობაში ჰქონდა დაგროვილი სიძულვილი" და დასძინა, რომ მისმა ოჯახმა იცოდა მისი "სირთულეების" შესახებ. პრეზიდენტის თქმით, არსებობს თავდამსხმელის "მანიფესტიც", რომელიც მის "მკვეთრ ანტიქრისტიანულ" განწყობებზე მიუთითებს.

ამერიკული მედია, სამართალდამცავ უწყებებზე დაყრდნობით, იუწყება, რომ 31 წლის ალენს სოციალურ ქსელებში ანტი-ტრამპისტული პოსტების მრავალწლიანი ისტორია აქვს.

ტრამპი თეთრი სახლის კორესპონდენტთა ვახშამს პრეზიდენტის რანგში პირველად დაესწრო. ბოლოს ის ამ ღონისძიებაზე 2011 წელს იმყოფებოდა, თუმცა მაშინ ის სტუმრის სტატუსით იმყოფებოდა.

შეგახსენებთ, შაბათს, ადგილობრივი დროით დაახლოებით 20:35 საათზე, სროლის ხმა სასტუმრო Washington Hilton-ის ფოიეში გაისმა. სწორედ ამ შენობის ქვედა სართულზე, დიდ დარბაზში, იმ მომენტში თეთრი სახლის კორესპონდენტთა ვახშამი მიმდინარეობდა. პრეზიდენტი, პირველი ლედი მელანია ტრამპი და ვიცე-პრეზიდენტი დაცვამ დარბაზიდან სასწრაფოდ გაიყვანა.

"მინდოდა მენახა, რა ხდებოდა... მინდოდა გამეგო, რა ვითარება იყო. სწორედ იმ მომენტში დავიწყეთ გაცნობიერება, რომ საქმე, შესაძლოა, მართლაც სერიოზულად იყო.", — განაცხადა ტრამპმა ინტერვიუში.

ოფიციალური პირების თქმით, სამართალდამცავებმა თავდამსხმელს ცეცხლით უპასუხეს. ის არ დაშავებულა, თუმცა საავადმყოფოში გამოკვლევაზე მაინც გადაიყვანეს. მას თან ჰქონდა ორი ცეცხლსასროლი იარაღი და დანები.

ინციდენტის დროს დაშავებული საიდუმლო სამსახურის აგენტი უკვე გაწერეს საავადმყოფოდან. მის სიცოცხლე ჯავშანჟილეტმა გადაარჩინა.

გადაცემა "60 წუთის" ინტერვიუში ტრამპი გააღიზიანა ჟურნალისტ ნორა ო’დონელის კითხვამ, სადაც მან ეჭვმიტანილის მანიფესტიდან ციტატა წაიკითხა "აღარ ვაპირებ, ნება დავრთო პედოფილს, მოძალადესა და მოღალატეს, რომ ჩემი ხელები თავისი დანაშაულებით გასვაროს". (კონკრეტული სახელების გარეშე). ტრამპმა ო’დონელს "სამარცხვინო" უწოდა და უთხრა, რომ მას უნდა რცხვენოდეს ამ ციტატების წაკითხვის გამო, რადგან ის არცერთი მათგანი არ არის.

ეს დონალდ ტრამპის მკვლელობის მცდელობის მესამე შემთხვევაა — 2024 წლის ივლისში, პენსილვანიაში, მას ტყვია ყურზე მოხვდა, ხოლო ამავე წლის სექტემბერში შეიარაღებული პირი მის გოლფ-კლუბთან დააფიქსირეს.

პრეზიდენტმა მომხდარი თეთრ სახლში ახალი, "სამხედრო საიდუმლო დარბაზის" მშენებლობის აუცილებლობის დასასაბუთებლად გამოიყენა, რასაც მანამდე ბევრი კრიტიკოსი ჰყავდა.