სიღნაღის მუნიციპალიტეტის სოფელ ტიბაანში მომხდარ ავარიას ახალგაზრდა კაცის სიცოცხლე ემსხვერპლა, დაშავდა 3 ადამიანი. ინფორმაციას "მთავარი ამბები კახეთიდან" ავრცელებს. მათ ცნობით, მაღალი სიჩქარით მოძრავი მსუბუქი ავტომობილი ოთხ გაჩერებულ ქვეითს ერთდროულად შეეჯახა.

შედეგად, სამმა კაცმა სხეულის სხვადასხვა სახის დაზიანებები მიიღო, ერთი კი ადგილზე გარდაიცვალა.
დაშავებულები წნორის "არქიმედეს" კლინიკაში გადაიყვანეს. კლინიკის მენეჯერის, ოთარ რუაძის ინფორმაციით, ერთი მათგანი თბილისში აგრძელებს მკურნალობას, მეორე პაციენტს ადგილზე ჩაუტარდა ქირურგიული ოპერაცია, ხოლო კიდევ ერთის ჯანმრთელობის მდგომარეობა შედარებით მსუბუქია.

როგორც "მთავარი ამბები კახეთიდან" წერს, მძღოლი არაფხიზელ მდგომარეობაში იმყოფებოდა და შემთხვევის ადგილიდან მიიმალა. სამართალდამცველებმა ის მალევე დააკავეს.

შსს-ს ინფორმაციით, მომხდარზე გამოძიება სისხლის სამართლის კოდექსის 276-ე მუხლით მიმდინარეობს, რომელიც სატრანსპორტო საშუალების მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა ან ჯანმრთელობის მძიმე დაზიანება გამოიწვია.