ამერიკელი მსახიობი და რეჟისორი, შონ პენი უკრაინაში ჩავიდა. ამის შესახებ უკრაინის პრეზიდენტი ვოლოდიმირ ზელენსკი სოციალურ ქსელში წერს. მისი თქმით, პენი უკრანის ნამდვილი მეგობარია და ომის პირველივე დღიდან ქვეყნის გვერდით დგას.

"შონ, შენი წყალობით ვიცით, თუ რას ნიშნავს უკრაინის ნამდვილი მეგობრობა.

შენ უკრაინის გვერდით დგახარ სრულმასშტაბიანი ომის პირველივე დღიდან.
ეს დღესაც ასეა.

და ჩვენ ვიცით, რომ შენ კვლავაც გააგრძელებ ჩვენი ქვეყნისა და ჩვენი ხალხის მხარდაჭერას", — დაწერა ზელენსკიმ.

ცნობისთვის, კინოვარსკვლავი იმავე დღეს თავისი მესამე "ოსკარის" მისაღებად არ გამოცხადდა. ამის შესახებ ინფორმაციას Reuters ავრცელებს.

65 წლის პენმა "ოსკარი" საუკეთესო მეორეხარისხოვანი როლისთვის მოიპოვა პოლიტიკურ თრილერში "ბრძოლა ბრძოლის შემდეგ" (One Battle After Another), თუმცა ცერემონია გამოტოვა, რათა ომით დაზარალებულ დედაქალაქში უკრაინის პრეზიდენტ ვოლოდიმირ ზელენსკისთან შესახვედრად ჩასულიყო.

პენი, რომელიც უკრაინის დიდი ხნის მხარდამჭერია, რუსეთთან ოთხწლიანი ომის განმავლობაში ქვეყანას რამდენჯერმე ეწვია. მან გადაიღო დოკუმენტური ფილმი უკრაინაში რუსეთის შეჭრის შესახებ, რომლის პრემიერაც 2023 წლის თებერვალში შედგა. 2022 წელს პენმა ზელენსკის, ყოფილ კომიკოსსა და მსახიობს, თავისი ერთ-ერთი "ოსკარიც" კი "ათხოვა".