ოცნების პარლამენტის თავმჯდომარე შალვა პაპუაშვილმა დიდი ბრიტანეთის ელჩი საქართველოში გარეტ უორდი "იმედის" და პოსტვ"-ის წინააღმდეგ "საქმის შეკერვაში" დაადანაშაულა. მისი თქმით, "დასტურდება, რომ ელჩია, ვინც თავისუფალ მედიაზე თავდასხმისთვის საქმე შეკერა, რაც ძალიან მძიმეა".

"გავარკვიეთ, თურმე, ბრიტანეთის ელჩი ქართულს რატომ სწავლობდა “პოსტვ”-სთვის და “იმედისთვის” რომ ეყურებინა და საქმეები შეეკერა თავისუფალი მედიის წინააღმდეგ. რა თქმა უნდა, ფაქტია, რომ თუკი რაიმეს შეიძლება ეყრდნობოდეს ბრიტანეთის გადაწყვეტილება, ეს მისი ელჩის მომზადებული საკითხებია. დასტურდება, რომ ელჩია, ვინც თავისუფალ მედიაზე თავდასხმისთვის საქმე შეკერა, რაც ძალიან მძიმეა. გუშინ სოცმედიაში მისი ერთ-ერთი ვიდეო ტრიალებდა, 5-ჯერ ვუყურე. ირონიაა, რომ ეს ადამიანი რამდენიმე თვის წინ დამტვრეული ქართულით გვეფიცებოდა, რომ თავისუფალი მედიის მხარდამჭერები არიან. ალბათ ეს ვიდეო რომ ჩაწერა, გავიდა თავის კაბინეტში და თავისუფალ მედიაზე თავდასხმის საქმისთვის საბაბების შეკერვა დაიწყო.

გუშინ დაიბარეს საგარეო საქმეთა სამინისტროში ერთადერთი მიზნით, რომ წარედგინა მტკიცებულებები, თუ რას ეფუძნება ბრიტანეთის ეს გადაწყვეტილება, თუმცა ვერცერთი მტკიცებულება ვერ წარადგინა. ეს კიდევ ერთხელ ადასტურებს, რომ ეს არის არაპროვოცირებული და გაუმართლებელი თავდასხმა თავისუფალ მედიაზე, რომელსაც არანაირი საფუძველი არ აქვს, ერთი. მეორე, უნდა დავფიქრდეთ რა არის საბოლოო მიზანი. საბოლოო მიზანი არის მართალი სიტყვის წინააღმდეგ წასვლა და ველის გასუფთავება მათივე პროპაგანდისტებისთვის. სულ რამდენიმე თვის წინ ბრიტანეთის საელჩო ცდილობდა პარტიული კედლის გაზეთი “ტაბულა” დაეფინანსებინა. შეგახსენებთ, რომ ბრიტანეთში თავს აფარებს “ფორმულას” მეპატრონე კეზერაშვილი. კეზერაშვილს არ გადმოგვცემს, რითაც ბრიტანეთი გვერდს უვლის საქართველოს სახელმწიფოს, ქართველი ხალხის სანქციებს. შესაბამისად ეს არის, ჩემი აზრთ, მიზანია, რომ ჩაახშონ თავისუფალი და მართალი სიტყვა და გაასუფთაონ გზა საკუთარი პროპაგანდისტებისთვის, რომლებსაც სხვადასხვა შავი სქემებით ევროპიდან აფინანსებდნენ.

…დასკვნა ერთია: ვინც ჩვენ სიტყვის თავისუფლების მცველი გვეგონა, სიტყვის თავისუფლების მკვლელი აღმოჩნდა. ამას თვალი უნდა გავუსწოროთ და დღეის იქით ბრიტანეთს, მის ელჩს და საქმიანობას ასე უნდა შევხედოთ", – განაცხადა პაპუაშვილმა ბრიფინგზე.

შეგახსენებთ, რომ დიდმა ბრიტანეთმა სამთავრობო პროპაგანდისტული "იმედი" და "პოსტვ" 24 თებერვალს დაასანქცირა.

რის შემდეგაც ოცნების საგარეო უწყებაში დაიბარეს დიდი ბრიტანეთის ელჩი გარეთ უორდი. შეხვედრის დასრულების შემდეგ საგარეო უწყების ხელმძღვანელმა, მაკა ბოჭორიშვილმა განაცხადა, რომ "40 წუთის განმავლობაში არ მოუსმენია არც ერთი არგუმენტი, რომელიც "იმედის" და "პოსტვ"-ის დასანქცირებას გაამართლებდა.