რეფორმეტრის ფარგლებში, საპენსიო რეფორმის მიმდინარეობა შეფასდა. შემფასებელთა ჯგუფმა რეფორმას 10 მაქსიმალური ქულიდან 3,97 დაუწერა, რაც, ამ ეტაპისთვის, ერთ-ერთი ყველაზე დაბალი მაჩვენებელია.

ყველაზე უარყოფითად დაინტერესებულმა პირებმა საპენსიო სისტემის არსებული მდგომარეობა შეაფასეს. ისინი არც საპენსიო რეფორმის პროგრესით არიან კმაყოფილები. საერთო განწყობა მოსალოდნელ შედეგებზე კი შედარებით პოზიტიურია.

ფოტო: რეფორმეტრი

ამ დროისათვის შემუშავებულია რეფორმის კონცეფცია, რომელიც მოიწონა მთავრობამ და რომელსაც სულ მალე მიეცემა კანონპროექტის სახე. უკვე განისაზღვრა საპენსიო სისტემის ფუნქციონირების წესები და მოხდა მარეგულირებელი ორგანოს იდენტიფიცირება. ასევე, შემუშავდა აქტივების მმართველი კომპანიების მიმართ მოთხოვნები. ეკონომიკის სამინისტროს წარმომადგენლების განცხადებით, კანონპროექტის გამოქვეყნება ოქტომბრის პირველ კვირაში უნდა მომხდარიყო, თუმცა კანონპროექტი ჯერ კიდევ მიუწვდომელი რჩება დაინტერესებული ჯგუფებისთვის.

სწორედ ამას უკავშირდება დაინტერესებული ჯგუფის მიერ გამოხატული მთავარი შენიშვნა რეფორმის განმახორციელებელი ორგანოების მიმართ. ვინაიდან რეფორმის კონცეფცია უკვე მრავალჯერ შეიცვალა და ამაზე უკვე დიდი ხანია მიდის საუბარი, მათთვის ჯერ კიდევ ზუსტად არ არის ცნობილი, თუ რას ითვალისწინებს კერძო დაგროვებითი სისტემა და რას გულისხმობს სოციალური პენსიის ინდექსაცია.

საპენსიო რეფორმამ რეფორმვერდიქტის - მთავრობის ერთიანი შეფასების - მცირედით შემცირება გამოიწვია 4,68-დან 4,50-მდე. პროფესიული განათლების რეფორმა შემდეგია, რომელიც სულ მალე დაემატება რეფორმეტრის პლატფორმას.

რეფორმეტრი ISET-ის კვლევითი ინსტიტუტის ახალი პროდუქტია, რომელიც დაინტერესებულ პირებს საქართველოში მიმდინარე ეკონომიკურ რეფორმებზე აწვდის ინფორმაციას. პლატფორმაზე მომხმარებელი იპოვის როგორც რეფორმების მიმდინარეობის შეფასებას, ისე იმ ეკონომიკურ მაჩვენებლებს, რომელზეც შერჩეული რეფორმა ახდენს გავლენას.