სირიელი მებრძოლები ამბობენ, რომ ქალაქი რაქაში ე.წ. ისლამური სახელმწიფოს სამწლიანი მმართველობა დაასრულეს და ქალაქზე სრული კონტროლი აღადგინეს. სირიის დემოკრატიული ძალების წარმომადგენლის, თალალ სელოს თქმით, ოთხთვიანი დაპირისპირების შემდეგ ბრძოლა დასრულდა.

BBC-ის ცნობით, 2014 წელს, ისლამური სახელმწიფოსთვის რაქა ე.წ. სახალიფოს სათაო ოფისი იყო, სადაც ისლამური კანონების ექსტრემისტული ინტერპრეტაცია ხდებოდა, რაც თავის მოკვეთას, წამებას და მოქალაქეების დატერორებას გულისხმობს.

ლონდონში ბაზირებული ორგანიზაციის, სირიის ადამიანის უფლებათა ობსერვატორიის მონაცემებით, ხოლო ხუთი თვის განმავლობაში, დაპირისპირებას სულ მცირე 3 250 ადამიანი შეეწირა, მათ შორის აქედან 1 130 სამოქალაქო პირი. ასობით ადამიანი დაკარგულია და შესაძლოა ნანგრევების ქვეშ იყვნენ მოყოლილი.

ისლამური სახელმწიფოს მებრძოლები ხშირად იყენებდნენ სამოქალაქო პირებს როგორც ფარებს და ესროდნენ მათ, ვინც თავის დაღწევას ცდილობდა.

გაერთიანებული ერების ორგანიზაციის ცნობით, ჯერ კიდევ გასულ კვირაში 8 ათასზე მეტი ადამიანი იყო რაქაში ჩარჩენილი, აპრილის შემდეგ კი 270 ათასი ადამიანი იქცა იძულებით გადაადგილებულ პირად.

ავია თავდასხმებმა, საარტილერიო ცეცხლმა რაქას სამოქალაქო ინფრასტრუქტურა და სახლები გაანადგურა.

რა დარჩა ისლამური სახელმწიფოსგან სირიაში?

ჯიჰადისტების ჯგუფს ჯერ კიდევ ჰყავს მებრძოლები, რომელთა უმეტესობა მდინარე ევფრატის მიმდებარედ, სამხრეთ-აღმოსავლეთით მდებარე დაირ-ელ-ზავრის პროვინციაში არიან ბაზირებულნი.

თუმცა, სირიის დემოკრატიული ძალები, რომლებსაც აშშ უჭერს მხარს და სირიის სახელისუფლებო ძალები, რომელთა უკანაც რუსეთი დგას, ერთმანეთისგან დამოუკიდებელ სამხედრო მოქმედებებს ახორციელებენ, რათა ერაყის საზღვართან მნიშვნელოვანი ტერიტორიები დაიკავონ.

ისლამური სახელმწიფო, ასევე, აგებს ბრძოლებს ერაყის სახელმწიფო ძალებთან.

კოალიციამ აშშ-ის მეთაურობით 17 ოქტომბერს განაცხადა, რომ სამხედრო ძალებმა ერაყისა და სირიის ტერიტორიის 93 790 კმ ტერიტორია დაიბრუნეს და 6,6 მილიონი ადამიანი გაათავისუფლეს ჯიჰადისტების კონტროლისგან.