"რადიო თავისუფლების" ევროპის ბიუროს რედაქტორი, რიკარდ იოზვიაკი, ევროკავშირის მიერ წარმოდგენილ სამუშაო დოკუმენტს გამოეხმაურა, სადაც წერია, რომ EU, უკრაინის დატოვების შემდეგ, რუსეთს ჯარების გაყვანას საქართველოს ოკუპირებული ტერიტორიებიდანაც სთხოვს. ამის შესახებ მან "ტვ პირველის" ეთერში ისაუბრა.

• ხატია დეკანოიძე: EU-მა დოკუმენტი გაავრცელა, სადაც სადაც რუსეთთან მოლაპარაკებების პირობებში საქართველოს ოკუპირებული ტერიტორიებიდან რუსული ჯარის გაყვანაზეა საუბარი

იოზვიაკის განმარტებით, აღნიშნული დოკუმენტი მაქსიმალისტურია და ძირითადად ყველაფერზე საუბრობს, რაც ბრიუსელის აზრით, რუსეთმა უნდა გააკეთოს. მისივე თქმით, ეს საკითხი ევროპელმა დიპლომატებმა უკვე განიხილეს ამ კვირაში ბრიუსელში და სავარაუდოდ, ის კვლავ განიხილება ევროკავშირის საგარეო საქმეთა მინისტრების შეხვედრაზე, რომელიც მომავალ კვირას, ორშაბათს, ბრიუსელში გაიმართება. იოზვიაკმა ასევე განაცხადა, რომ კაია კალასს სურს საქართველოს მთავრობისთვის სანქციების დაწესება, მაგრამ ჯერ ერთსულოვნება არ არის

"ეს არის დოკუმენტი, რომელიც ევროკავშირმა წარმოადგინა, როგორც საპასუხო წინადადება ყველა იმ დათმობაზე, რასაც რუსეთი უკრაინისგან ითხოვს. ეს არის ძალიან მაქსიმალისტური დოკუმენტი, რომელიც ძირითადად ყველაფერზე საუბრობს, რაც რუსეთმა უნდა გააკეთოს ბრიუსელის აზრით. ერთ-ერთი რამ, რასაც ისინი აღნიშნავენ არის ის, რომ უკრაინის დატოვების და იქ ჯარების შემცირების შემდეგ, რუსეთმა უნდა დატოვოს ყველა მეზობელი ქვეყანა, სადაც მათ ჯარები ჰყავთ, მათ შორის საქართველო — აფხაზეთი და სამხრეთ ოსეთი, ასევე მისი ბაზა სომხეთში, ბელარუსში და, რა თქმა უნდა, მოლდოვაში. ევროკავშირი ფიქრობს, რომ რუსეთმა ესეც უნდა გაითვალისწინოს მოლაპარაკებებში.

ეს საკითხი ევროპელმა დიპლომატებმა უკვე განიხილეს ამ კვირაში ბრიუსელში და სავარაუდოდ, ის კვლავ განიხილება ევროკავშირის საგარეო საქმეთა მინისტრების შეხვედრაზე, რომელიც მომავალ კვირას, ორშაბათს, ბრიუსელში გაიმართება. კაია კალასი ამ საკითხის ინიციატორია, ის ძალიან მკაცრია რუსეთის მიმართ. ის რუსეთის წინააღმდეგაა, ის საქართველოს მთავრობის წინააღმდეგაა, მას სურს საქართველოს მთავრობისთვის სანქციების დაწესება, მაგრამ ჯერ ერთსულოვნება არ არის, მაგრამ ეს ასევე იმის ნიშანია, რომ ის კვლავაც იქცევა გაბედულად და მოითხოვს რუსეთისგან მაქსიმალურ დათმობებს. ეს სამუშაო დოკუმენტია, კაია კალასი ფიქრობს რომ რაც უფრო მეტს მოითხოვ მით მეტია შანსი მიიღო რაღაც, თუ არაფერს მოითხოვ ვერც ვერაფერს მიიღებ. ის იაზრებს, რომ ზეწოლის გარეშე რუსეთი არ დაიხევს უკან მეზობელი ქვეყნებიდან, ეს უკანასკნელი კი ნამდვილად არის ევროკავშირის სურვილი," — განაცხადა რიკარდ იოზვიაკმა.

შეგახსენებთ, სამუშაო დოკუმენტის ერთ-ერთი ულტიმატუმი რუსეთთან მოლაპარაკებების დასაწყებად ითვალისწინებს "ბელარუსში, უკრაინაში, მოლდოვის რესპუბლიკაში, საქართველოში და სომხეთში რუსული სამხედრო ძალების ყოფნისა და განლაგების აკრძალვას".

"კიდევ ერთი ულტიმატუმი ითვალისწინებს ბელარუსში ბირთვული იარაღის არარსებობას და რუსეთის სამხედრო ძალების ყოფნისა და განლაგების აკრძალვას ბელარუსში, უკრაინაში, მოლდოვას რესპუბლიკაში, საქართველოსა და სომხეთში. რუსი ჯარები ათწლეულების განმავლობაში იყვნენ განლაგებული რუსეთის მიერ კონტროლირებად სეპარატისტულ რეგიონებში, როგორიცაა აფხაზეთი, სამხრეთ ოსეთი და დნესტრისპირეთი, ასევე სომხეთსა და ბელარუსში", — წერია დოკუმენტში.