კრემლმა ხუთი ევროპული ქვეყნის ბრალდებები, თითქოს რუსულმა სახელმწიფომ ორი წლის წინ ალექსეი ნავალნი სამხრეთ ამერიკული შხამიანი ბაყაყის ტოქსინით მოკლა, კატეგორიულად უარყო, თუმცა ნავალნის მეუღლემ განაცხადა, რომ სიმართლე საბოლოოდ დამტკიცდა. ამის შესახებ ინფორმაციას Reuters ავრცელებს.

მანამდე, დიდმა ბრიტანეთმა, საფრანგეთმა, გერმანიამ, შვედეთმა და ნიდერლანდებმა განაცხადეს, რომ ნავალნის სხეულიდან აღებული ნიმუშების ანალიზმა დაადასტურა ეპიბატიდინის არსებობა — ტოქსინის, რომელიც სამხრეთ ამერიკაში მცხოვრებ შხამიან ბაყაყებში გვხვდება და რუსეთში ბუნებრივად არ არსებობს.

"ნავალნი ციხეში ყოფნისას გარდაიცვალა, რაც ნიშნავს იმას, რომ რუსეთს ჰქონდა საშუალება, მოტივი და შესაძლებლობა, მისთვის ეს შხამი მიეცა", — ნათქვამია მათ განცხადებაში.

კრემლის პრესსპიკერმა დიმიტრი პესკოვმა ეს ბრალდებები უარყო.

"ბუნებრივია, ასეთ ბრალდებებს არ ვიღებთ. ჩვენ მათ არ ვეთანხმებით. მივიჩნევთ მიკერძოებულად და უსაფუძვლოდ და მკაცრად ვუარყოფთ", — განუცხადა პესკოვმა ჟურნალისტებს.

უფრო ადრე, რუსეთის საგარეო საქმეთა სამინისტროს პრესსპიკერმა მარია ზახაროვამ განაცხადა, რომ მოსკოვი შესაბამის კომენტარს მხოლოდ იმ შემთხვევაში გააკეთებდა, თუ ბრალდებების ავტორი ქვეყნები გამოაქვეყნებდნენ და დეტალურად წარმოადგენდნენ ტესტების შედეგებს.

როგორც სახელმწიფო სააგენტო TASS წერს, ეს ბრალდებები "მხოლოდ პროპაგანდაა, რომელიც დასავლეთის აქტუალური პრობლემებიდან ყურადღების გადატანას ისახავს მიზანს".

ორშაბათს 15-მა ქვეყანამ — ძირითადად ევროპულმა, თუმცა მათ შორის ავსტრალიამ, ახალმა ზელანდიამ და კანადამაც — განცხადება გამოაქვეყნეს, რომელშიც კვლავ მოითხოვეს ნავალნის სიკვდილის გამჭვირვალე გამოძიება.

შხამიანი ბაყაყის ტოქსინის შესახებ ბრალდებები გაჟღერდა მიუნხენის უსაფრთხოების კონფერენციაზეც. ნავალნის მეუღლემ, იულია ნავალნაიამ, რომელმაც თავიდანვე ამტკიცებდა, რომ მისი ქმარი რუსულმა სახელმწიფომ მოკლა, განაცხადა, რომ ეს დასკვნები მის პოზიციას მტკიცებულებით ამყარებს.

"ორი წელი. ჩვენ სიმართლეს მივაღწიეთ და ერთ დღეს სამართლიანობასაც მივაღწევთ", — დაწერა ნავალნაიამ X-ზე,

შეგახსენებთ, ნავალნი, პრეზიდენტ ვლადიმირ პუტინის ყველაზე ცნობილი კრიტიკოსი, 2024 წლის 16 თებერვალს გარდაიცვალა. ის 47 წლის იყო.ის პუტინის მეხუთე ვადით ხელახლა არჩევამდე ერთი თვით ადრე გარდაიცვალა. მის გარდაცვალებას რუსული სახელმწიფო ბუნებრივ მიზეზებს მიაწერდა.