ქუთაისის რაიონულ სასამართლოში 4 ჭიათურელი მაღაროელის სასამართლო პროცესი გაიმართა. ბრალდებულის სკამებზე ისხდნენ: გიორგი ნეფარიძე, მერაბ სარალიძე, არჩილ ჭუმბურიძე და თენგიზ გველესიანი. ისინი 28 აპრილის ღამეს მომხდარი ინციდენტის გამო დააკავეს, როდესაც პროტესტის მონაწილეები და შუქრუთის მაღაროს დირექტორი, თენგიზ კობერიძე ერთმანეთს დაუპირისპირდნენ.

დღევანდელ სასამართლო პროცესზე ცნობილი გახდა, რომ გიორგი ნეფარიძეს გარდა ჯგუფური ძალადობისა, მოსამართლისთვის შეურაცხყოფის მიყენებასაც ედავებიან.

ნეფარიძის ადვოკატმა, ნინო ანდრიაშვილმა "პუბლიკას" განუცხადა, რომ მისი დაცვის ქვეშ მყოფს ბრალდება 12 სექტემბრის ინციდენტის გამო დაუმძიმდა. აღნიშნულ დღეს სასამართლო პროცესზე ბრალდების მხარის ერთ-ერთი მოწმე იკითხებოდა, რა დროსაც ნეფარიძე მას მოუწოდებდა ცრუ ჩვენება არ მიეცა. მოსამართლე თამარ მაზანაშვილმა აღნიშნული რეპლიკისთვის ბრალდებული სასამართლო დარბაზიდან გააძევა, რის დროსაც მან მოსამართლეს მიმართა სიტყვებით "დაახვიე [განჩინება] და ერთ ადგილას გაიკეთე.

მოსამართლე თამარ მაზნიაშვილი აღნიშნულ საქმეში დაზარალებულადაა ცნობილი — შესაბამისად, დღევანდელ სასამართლო პროცესზე ბრალდების მხარემ მისი აცილება მოითხოვა, რადგან "არსებობდა ეჭვი იმისა, რომ ის იქნებოდა მიკერძოებული და ვერ წარმართავდა პროცესს ისე, როგორც საჭირო იყო". მაზნიაშვილმა შუამდგომლობა არ დააკმაყოფილა, რადგან მისი განმარტებით ის იმ საქმეში არ არის დაზარალებულად ცნობილი, რომელსაც ის განიხილავს.

პროცესზე სიტყვის უფლებით ისარგებლა მერაბ სარალიძემ. მაღაროელმა სიტყვის წარმოთქმისას ოცნების ხელისუფლების პრემიერმინისტრ ირაკლი ღარიბაშვილის მიერ 26 ნოემბერს გაკეთებულ კომენტარზე ისაუბრა. კობახიძემ ჭიათურელებზე საუბრისას თქვა, რომ "კრიმინალი ვერ დარჩება დაუსჯელი".

სარალიძემ ასევე გაიხსენა, როგორ არ დააკმაყოფილა მთავრობამ მათი მოთხოვნა და დაზარალებულ მაღაროელებს არ შეხვდა. მიუხედავად კომპანიასთან შეთანხმებისა, დაკავებულ მაღაროელებს ხელფასის დავალიანება არ ჩარიცხვიათ.

"როდესაც ხელისუფლება ამბობს, რომ ჩვენი ქვეყნის და ხალხის ინტერესებიდან გამომდინარე ვსაუბრობთო, ჩვენ პრემიერს არაერთხელ მივმართეთ, ჯერ წერილობით, ადგილობრივი ხელისუფლების წარმომადგენლით, შემდეგ საჯაროდ და ღიად ვსაუბრობდით და გულწრფელად ვთხოვდით, რომ ჩარეულიყვნენ ამ სიტუაციაში და ნუ დატოვებდნენ ხალხს კომპანიასთან პირისპირ. იმ კომპანიასთან, რომელსაც არ ადარდებს ადამიანების ბედი და მისთვის ყველა უკანონობა არის კანონიერი როცა სჭირდება და აწყობს.

არავინ თავი არ შეიწუხა, არავინ ჩვენ არ მოგვისმინა და დაახლოებით 2 თვის წინ პრემიერმა პარლამენტში ჩვენთან დაკავშირებით განცხადება გააკეთა - 6 კაცია დაჭერილი, დამნაშავეები არიან და მოიხდიან სასჯელსო. ახლა მე მაინტერესებს, რომელ 6 კაცზეა საუბარი? აქ ოთხნი ვსხედვართ...

ძალიან ბევრი დეზინფორმაციული და ცილისმწამებლური განცხადება გაუკეთებიათ ჩვენთან მიმართებით და აღარც მაწუხებს, შევეჩვიე უკვე, მაგრამ როდესაც ქვეყნის პირველი პირი ასეთ განცხადებას აკეთებს, ალბათ, პრემიერს ჩვენზე კარგად უნდა ესმოდეს, რომ ჩვენ ჯერ ბრალდებულები ვართ და არა მსჯავრდადებულები.

არასოდეს არავინ თავი რომ არ შეიწუხა და ამ ხალხის [ჭიათურელების] პრობლემები არ მოისმინა და სანამ სასამართლო გადაწყვეტილებას მიიღებს პრემიერი რომ ასეთ განცხადებას აკეთებს, ჯერ გულდასაწყვეტია და მერე კიდევ, რისი მოლოდინი უნდა მქონდეს? უბრალო ადამიანის სიტყვას არც კი მივაქცევ ყურადღებას, მაგრამ ქვეყნის პირველი პირი როდესაც აანონსებს, რომ პატიმრობაში უნდა ვიყოთ, ეს ჩემთვის იმის მანიშნებელია, რომ სასამართლოზე ზეწოლას ახდენს და როგორც ჩანს, მთელი პოლიტიკური ელიტაა ჩართული ამ ყველაფერში, რომ ეს უსამართლობა თავს მოგვახვიონ, მაგრამ ღმერთი სამართლიანია და სამართალი ადრე თუ გვიან გაიმარჯვებს," — განაცხადა სარალიძემ სასამართლო პროცესზე. (წყარო პუბლიკა)

მოსამართლემ დაკავებულები კვლავ პატიმრობაში დატოვა. ჯგუფური ძალადობის საქმეზე დაკავებული მაღაროელებიდან ორს 4-დან 6 წლამდე პატიმრობა ემუქრება, ხოლო ორს — 6-დან 9 წლამდე.