3 ჭიათურელმა პროტესტის ნიშნად პირი ამოიკერა. მაღაროელები უკვე 125-ე დღეა აპროტესტებენ და მე-14 დღეა შიმშილობენ. მათი მთავარი მოთხოვნაა დაკავებული 4 მაღაროელი არჩილ ჭუმბურიძე, მერაბ სარალიძე, თენგიზ გველესიანი და მერაბ სარალიძე პატიმრობიდან გაათავისუფლონ. მაღაროელების განცხადებაში ვკითხულობთ, რომ ამ დროისთვის 7 ადამიანი შიმშილობს, მათ შორის დაკავებული მერაბ სარალიძეც.

"დღეს პროტესტის 124-ე და შიმშილობის 13-ე დღეა. შიმშილობა და პროტესტი გაგრძელდება მანამ, სანამ პირში სული გვექნება. პროტესტის მთავარი მიზეზი და ერთადერთი მოთხოვნაა ჩვენი უსამართლოდ დაკავებული ოთხი თანამებრძოლის გათავისუფლება.

დღეს უკიდურესი ფორმის პროტესტს კიდევ ორი მოშიმშილე შეუერთდა — ამჟამად შიმშილობს 7 ადამიანი, ხოლო სამ მათგანს პირი აქვს ამოკერილი — მირზა ლოლაძე, გოგა აბესაძე, შავლეგი გოგსაძე.

შიმშილობენ: ტარიელ მიქაცაძე, სიმონ მიქაცაძე, ჯანო ლაბაძე, მერაბი სარალიძე (ციხეში).

ასე ხდება, როდესაც უსამართლობას ვერ სჯაბნი — იძულებული ხარ, საკუთარი ჯანმრთელობით გარისკო.

შეგახსენებთ, რომ მოშიმშილეები უარს აცხადებენ სასწრაფო დახმარების გამოძახებაზე და თავიანთი ჯანმრთელობის მონიტორინგზე. თავისუფლება და სოლიდარობა ბიჭებს!" — წერს "მაღაროელი".

დაკავებულ 4 მაღაროელს 28 აპრილის ღამის ინციდენტს ედავებიან, როდესაც პროტესტის მონაწილეები და შუქრუთის მაღაროს დირექტორი, თენგიზ კობერიძე ერთმანეთს დაუპირისპირდნენ. ბრალდებულებს თენგიზ კობერიძეზე ფიზიკურ თავდასხმას ედავებიან. 12 ივნისს, მოსამართლე ნიკოლოზ მარგველაშვილმა არ დააკმაყოფილა შუამდგომლობა და აღმკვეთი ღონისძიების გირაოს მაგივრად, პატიმრობა გამოიყენა. ბრალდებულებიდან ორს 4-დან 6 წლამდე პატიმრობა ემუქრება, ხოლო ორს — 6-დან 9 წლამდე.