სამხრეთ კაროლინას რესპუბლიკელმა სენატორმა ლინდსი გრეჰემმა ორშაბათს სოციალურ ქსელ X-ზე ფოტო გამოაქვეყნა , სადაც იგი პრეზიდენტ დონალდ ტრამპთან ერთად ჩანს, რომელსაც ხელში ქუდი უჭირავს წარწერით: Make Iran Great Again ("გავხადოთ ირანი კვლავ დიდებული"). ამის შესახებ ინფორმაციას CBS ავრცელებს.

"კიდევ ერთი შესანიშნავი დღე პრეზიდენტ დონალდ ტრამპთან, რომელმაც ამერიკა ისევ დააბრუნა — უფრო ძლიერი, ვიდრე ოდესმე, როგორც ქვეყნის შიგნით, ისე მის ფარგლებს გარეთ. ღმერთმა დალოცოს ჩვენი მთავარსარდალი და ყველა ის მამაცი ქალი და კაცი, ვინც მის ხელმძღვანელობით მსახურობს," — დაწერა გრეჰემმა.

მან აღნიშნა, რომ ამაყობს, როგორც ამერიკის მოქალაქე.

"ღმერთმა დალოცოს და დაიცვას ირანის მამაცი ხალხი, რომლებიც ტირანიის წინააღმდეგ დგანან," — ამ სიტყვებით დაასრულა მან პოსტი.

ცნობისთვის, ტრამპმა თვის დასაწყისში ირანი გააფრთხილა, რომ შეერთებული შტატები უქმად არ იჯდება, თუ ირანი მომიტინგეების წინააღმდეგ სასიკვდილო ძალას გამოიყენებს.

შეგახსენებთ, ირანში საპროტესტო აქციები კვლავ მიმდინარეობს, რომელთაც, ბოლო ცნობებით, სულ მცირე, 35 ადამიანი ემსხვერპლა.

ირანის ხელისუფლებამ არაერთხელ ჩაახშო პროტესტები მაღალი ფასების, გვალვის, ქალთა უფლებებისა და პოლიტიკური თავისუფლებების გამო, ხშირად მკაცრი უსაფრთხოების ზომებითა და მასობრივი დაკავებებით.

Reuters-ის ინფორმაციით, ირანის ეკონომიკა წლებია სირთულეებს განიცდის, ძირითადად თეირანის ბირთვულ პროგრამასთან დაკავშირებული აშშ-ისა და დასავლეთის სანქციების გამო. ივნისში ისრაელთან 12-დღიანმა საჰაერო ომმა ქვეყნის ფინანსურ მდგომარეობას დამატებითი დარტყმა მიაყენა.

2025 წელს ირანული რიალი დოლართან მიმართებაში დაახლოებით ორჯერ გაუფასურდა, ხოლო ოფიციალურმა ინფლაციამ დეკემბერში 42.5% შეადგინა.