ჟურნალისტი ზვიად ქორიძე მიიჩნევს, რომ საზოგადოებისთვის მნიშვნელოვანი ინფორმაციის ფლობისა და მასზე მასალის მომზადების გამო, ჟურნალისტის მიმართ გამოძიების დაწყების მოთხოვნა ავტორიტარული რეჟიმისთვისაა დამახასიათებელი. ასე გამოეხმაურა ქორიძე საპროკურორო საბჭოს წევრის, იურისტ ირმა ჭკადუას მოთხოვნას რუსთავი 2-ის ჟურნალისტის დასჯასთან დაკავშირებით.

როგორც ჭკადუამ IPress-ს განუცხადა, თამარ ბაღაშვილმა მას დაურეკა და კომენტარი სთხოვა ციანიდის დახურულ სხდომაზე პატრიარქის დაცვის ყოფილი უფროსის, სოსო ოხანაშვილის ბრალდებაზე. კერძოდ, როგორც ინტერვიუდან ირკვევა, ოხანაშვილმა ირმა ჭკადუა საპატრიარქოსთან დაკავშირებით კორუფციაში დაადანაშაულა.

ირმა ჭკადუა დარწმუნებულია, რომ ბაღაშვილს არ აქვს უფლება, საჯარო გახადოს დახურული საქმის შესახებ გაგებული დეტალები და ის სწორედ ამიტომ ითხოვს მის დასჯას. აღნიშნული სიუჟეტი ეთერში ჯერ არ გასულა და ის მზადების პროცესშია.

"როგორც კი პროკურატურა გადავა ამ ზღვარს, მივა ჟურნალისტთან და ეტყვის: შენ უნდა გათქვა წყარო, ვინც მოგაწოდა ინფორმაცია. ეს უკვე არის ავტორიტარიზმი. ეს სხვანაირად არ შეიძლება შეფასდეს", - ამბობს ჟურნალისტი.

ქორიძის თქმით, მოპოვებული ინფორმაციის გამო, ჟურნალისტის წინააღმდეგ გამოძიების დაწყება ნიშნავს, რომ მისგან წყაროს გამხელას მოითხოვენ, რაც დემოკრატიულ პრინციპს ეწინააღმდეგება და თავისუფალ მედიას ანგრევს. მისი აზრით, მსგავსი შემთხვევაში, ყველა ჟურნალისტს დაიბარებენ და ჰკითხავენ ინფორმაციის მიმწოდებელ წყაროს.

"ხელისუფლების ორგანოებმა უნდა გამოიჩინონ მაღალი დემოკრატიული თვითშეგნება და არ დაუშვას მედიის მიმართ დაიწყოს დევნა საიდუმლოს შემცველი ინფორმაციის ფლობის გამო", - ამბობს ქორიძე.

მისი თქმით, ყველა ჟურნალისტს სურს მოიძიოს საზოგადოებისთვის მნიშვნელოვან საკითხებზე ინფორმაცია. სწორედ ამიტომ, მას მიაჩნია, რომ აბსოლუტურად გასაგებია, თუ რატომ ჰქონდა რუსთავი 2-ის ჟურნალისტს მსგავსი ინფორმაციის მოპოვების სურვილი.

"საზოგადოების ინტერესი ნამდვილად არის, რომ მან გაიგოს და მეტად ინფორმირებული იყოს. ამ შემთხვევაში, ინფორმაციის მოძიებისას ჟურნალისტის ბრალეულობა არაა. თუ ვინმეს ჰქონდა ვალდებულება, რომ ის ინფორმაცია, რომელიც საიდუმლო იყო არ გაემხილა, კი ბატონო ამაზე იმსჯელოს პროკურატურამ", - აღნიშნავს ზვიად ქორიძე.