2025 წელს, ირანში ნარკოტიკებთან დაკავშირებული დანაშაულებისთვის, მკვლელობისთვის, ჯაშუშობისთვის და გაუპატიურებისთვის მსჯავრდადებული 1922 ადამიანი სიკვდილით დასაჯეს. ამის შესახებ ირანის ადამიანის უფლებათა აქტივისტების საინფორმაციო სააგენტოს (HRANA) მიერ გამოქვეყნებულ 2025 წლის ანგარიშშია ნათქვამი.

მათ მიერ წარმოდგენილი სტატისტიკის თანახმად, გასულ წელს ირანში სიკვდილით დასჯილთა რიცხვი 2-ჯერ აღემატება 2024 წლის მაჩვენებელს და ბოლო ათი წლის განმავლობაში ყველაზე მაღალია.

ანგარიშში ასევე აღნიშნულია, რომ გასულ წელს სიკვდილით დასჯილთა 87% მამაკაცი იყო, 3% — ქალი, ხოლო სიკვდილით დასჯილთა 10%-ის სქესის დადგენა შეუძლებელია.

HRANA-ს ცნობით, სიკვდილის დასჯა უმეტესობა ფარულად ან საჯარო განცხადების გარეშე განხორციელდა, თუმცა ათი განაჩენი საჯაროდ აღსრულდა. 2025 წელს გამოტანილი 168 სიკვდილით დასჯიდან ხუთი პირდაპირ საჯარო სიკვდილით დასჯას ითვალისწინებდა.

გასულ წელს ირანის ხელისუფლება ყველაზე ხშირად სიკვდილით სჯიდა ადამიანებს მკვლელობისა (47.55%) და ნარკოტიკებთან დაკავშირებული დანაშაულებისთვის (46.10%).

სიკვდილის დასჯა ასევე განხორციელდა: სექსუალური დანაშაულისთვის (1.66%), სახელმწიფო პოლიტიკური და რელიგიური წესრიგის წინააღმდეგ ჩადენილი დანაშაულებისთვის (1.35%), უსაფრთხოების დანაშაულებისთვის (მათ შორის ჯაშუშობა, ტერორიზმი ან ტერორისტული თავდასხმები, 0.73%), "ღვთისადმი მტრული ქმედებებისთვის" (0.68%), ეკონომიკური დანაშაულებისთვის (0.50%), შეიარაღებული ძარცვისთვის (0.50%) და "დედამიწაზე კორუფციის გავრცელებისთვის" (0.16%).

როგორც გამოცემა The Daily Telegraph ირანელ აქტივისტებზე დაყრდნობით იუწყება, ისრაელთან 12-დღიანი ომის შემდეგ, ირანის ხელისუფლებამ სიკვდილით დასჯა ბოლო 30 წელთან შედარებით უფრო აქტიურად გამოიყენა. აგვისტოში, სასამართლო ხელისუფლების ხელმძღვანელმა, გოლამ ჰოსეინ მოჰსენი-ეჯეიმ, განაცხადა, რომ ხელისუფლება გადამწყვეტი იქნება ჯაშუშობაში ეჭვმიტანილებისთვის ამ სასჯელის გამოყენებისას.