ვენესუელის ვიცეპრეზიდენტმა და ნავთობის მინისტრმა დელსი როდრიგესმა ოფიციალურად დადო ფიცი და ქვეყნის დროებით პრეზიდენტი გახდა. ეს იმ ფონზე მოხდა, როდესაც აშშ-ის მიერ დაკავებული პრეზიდენტი ნიკოლას მადურო ნიუ-იორკის სასამართლოში ნარკოდანაშაულთან დაკავშირებული ბრალდებებით წარსდგა. ამის შესახებ ინფორმაციას Reuters ავრცელებს.

56 წლის როდრიგესი შრომითი სამართლის იურისტია, რომელიც კერძო სექტორთან მჭიდრო კავშირებით და მმართველი პარტიისადმი ერთგულებითაა ცნობილი.

ორშაბათს, 5 იანვარს, ფიცი ასევე დადო გასული წლის მაისში არჩეულმა 283-მა დეპუტატმა. მათგან მხოლოდ მცირე ნაწილი მიეკუთვნება ოპოზიციას — ოპოზიციის უმეტესობამ, განსაკუთრებით ნობელის პრემიის ლაურეატის მაჩადოს ხელმძღვანელობით მოქმედმა ფრთამ, არჩევნებს ბოიკოტი გამოუცხადა. ერთადერთი დეპუტატი, რომელიც სხდომას არ ესწრებოდა, იყო პირველი ლედი სილია ფლორესი, რომელიც აშშ-ში პატიმრობაში იმყოფება.

ცნობისთვის, მადუროს ბრალად ედება კოკაინის ტრეფიკინგის ქსელის ხელმძღვანელობა, რომელიც ძალადობრივ ჯგუფებთან, მათ შორის მექსიკის სინალოას და ზეტას კარტელებთან, კოლუმბიის FARC-ის მეამბოხეებთან და ვენესუელის კრიმინალურ დაჯგუფება "ტრენ დე არაგუასთან" თანამშრომლობდა.

მას ოთხი სისხლის სამართლის ბრალდება აქვს წაყენებული: ნარკოტერორიზმი, კოკაინის იმპორტის მიზნით შეთქმულება, ასევე ავტომატური იარაღისა და დამანგრეველი მოწყობილობების ფლობა.

მადურო წლებია უარყოფს ამ ბრალდებებს და აცხადებს, რომ ისინი ვენესუელის მდიდარი ნავთობის რესურსების ხელში ჩაგდებისკენ მიმართული იმპერიალისტური გეგმების საფარია.

შეგახსენებთ, აშშ-ს პრეზიდენტმა დონალდ ტრამპმა 3 იანვარს განაცხადა, რომ ვენესუელის პრეზიდენტი ნიკოლას მადურო და მისი მეუღლე დააკავეს და ქვეყნიდან ვერტმფრენით აშშ-ში გადმოიყვანეს მას შემდეგ, რაც აშშ-მა კარაკასზე "მასშტაბური დარტყმები" განახორციელა.