აშშ-ის სახელმწიფო მდივანმა მარკ რუბიომ NBC News-ის ეთერში ჟურნალისტის დასმულ კითხვაზე "არის, თუ არა აშშ ვენესუელასთან ომში?" თქვა, რომ ეს არ არის ომი და ამერიკა ნარკოტიკებით მოვაჭრე ორგანიზაციებს ეომება.

"ეს არ არის ომი. ვგულისხმობ იმას, რომ ჩვენ ნარკოტიკებით მოვაჭრე ორგანიზაციების წინააღმდეგ ვართ ომში. ეს არ არის ომი ვენესუელის წინააღმდეგ. ჩვენ ვასრულებთ ამერიკულ კანონებს ნავთობის სანქციებთან დაკავშირებით. ჩვენ სანქციები დავაწესეთ სუბიექტების მიმართ. ჩვენ მივდივართ სასამართლოში, ვიღებთ ორდერს და ვაკავებთ ნავთობით სავსე ნავებს და ეს გაგრძელდება. ასევე, ჩვენ ვიტოვებთ უფლებას, დარტყმები განვახორციელოთ ნარკოტიკებით დატვირთული ნავების წინააღმდეგ, რომლებსაც ნარკოტიკები აშშ-ში შემოაქვთ," — განაცხადა რუბიომ (თარგმანი ტაბულა).

BBC-ის ინფორმაციით, კითხვაზე მართავს თუ არა აშშ ვენესუელას რუბიომ განაცხადა, რომ აშშ ვენესუელას მართვისას "მიმართულებას აძლევს" და მოვლენების წინსვლას უწყობს ხელს.

რუბიოს ასევე ჰკითხეს, სჯერა თუ არა, რომ დროებითი პრეზიდენტი დელსი როდრიგესი ვენესუელას ლეგიტიმური პრეზიდენტია, რაზეც მან პირდაპირი პასუხი არ გასცა და თქვა, რომ "საუბარი არ არის კანონიერ პრეზიდენტზე", რადგან აშშ მიიჩნევს, რომ მოქმედი რეჟიმი ლეგიტიმური არ არის.

შეგახსენებთ, ვენესუელის პრეზიდენტ ნიკოლას მადუროს დაკავების შემდეგ უზენაესმა სასამართლომ პრეზიდენტის მოვალეობის შემსრულებლად ვიცეპრეზიდენტი დელსი როდრიგესი დანიშნა. დაკავების შემდეგ, ნიკოლას მადურო და მისი მეუღლე სილია ფლორესი მანჰეტენის ფედერალურ სასამართლოს წინაშე უნდა წარდგნენ — ამჟამად ცოლ-ქმარი ბრუკლინის წინასწარი დაკავების იზოლატორში იმყოფებიან.