სომხეთმა და ევროკავშირმა ახალი სტრატეგიული დღის წესრიგი მიიღეს, რასაც მათი პარტნიორობა სტრატეგიულ დონეზე აჰყავს. ევროკავშირმა "სამშვიდობო პროცესის მხარდაჭერისა და უფრო გამძლე სომხეთისთვის" 15 მილიონი ევროს (17 მილიონი დოლარი) გამოყოფაც დააანონსა.

გადაწყვეტილება სამშაბათს ბრიუსელში, სომხეთისა და ევროკავშირის პარტნიორობის საბჭოს მეექვსე შეხვედრის ფარგლებში მიიღეს. შეხვედრას სომხეთის საგარეო საქმეთა მინისტრი არარატ მირზოიანი, ევროკავშირის უმაღლესი წარმომადგენელი კაია კალასი და ევროკომისარი გაფართოების საკითხებში მარტა კოსი ესწრებოდნენ.

საერთო პრესკონფერენციაზე კალასმა განაცხადა, რომ სომხეთსა და ევროკავშირს შორის თანამშრომლობა "წლების განმავლობაში მხოლოდ უმჯობესდება". მან ახალი სტრატეგიული დღის წესრიგი უწოდა "საერთო ამბიციას, ერთად იმუშაონ ბევრად უფრო მრავალ სფეროში".

ამ სფეროებს შორისაა სომხეთის რეფორმები, სომხური ეკონომიკის "დივერსიფიკაცია და მოდერნიზაცია", ვიზა ლიბერალიზაცია და უსაფრთხოება.

კალასმა ასევე 15 მილიონი ევროს გამოყოფა დააანონსა, რომელიც "დააფინანსებს მრავალ ინიციატივას, მათ შორის ნაღმების განეიტრალების სწავლებასა და აღჭურვილობას, ასევე რეგიონული ნდობის გამყარების ღონისძიებებს". მისი თქმით, თანხების ნაწილი გამოყენებული იქნება საზღვრის მართვისა და დეზინფორმაციასთან ბრძოლის მიმართულებითაც.

კალასმა აღნიშნა, რომ ევროკავშირმა სომხეთის 2026 წლის საპარლამენტო არჩევნების წინ, "რუსეთისა და მისი მარიონეტებისგან" დეზინფორმაციის კამპანიები შენიშნა — კამპანიები, "იგივე ქსელების მიერ, რომლებიც მოლდოვაში ვიხილეთ".

"ჩვენი დაფინანსება ასევე მოიცავს უცხოურ ჩარევაზე რეაგირებას, მისი აღმოჩენისა და ანალიზის სისტემებს," — თქვა კალასმა და დაამატა: "მოდით, ნათლად ვთქვათ — თქვენ ამ გამოწვევებს მარტო არ უპირისპირდებით. ჩვენ აქ ვართ, რათა აქტიურად დაგიჭიროთ მხარი."

კალასმა ასევე სომხეთ–აზერბაიჯანის მშვიდობის პროცესის მიმართ ევროკავშირის სრული მხარდაჭერა გამოხატა.

თავის მხრივ, მირზოიანმა აღნიშნა, რომ ახალი დღის წესრიგის ხელმოწერით, მხარეებმა თავიანთი პარტნიორობა სხვა სტრატეგიულ დონეზე აიყვანეს და "ახალი დღის წესრიგი" გახსნეს.

"ეს, რა თქმა უნდა, ჩვენი ამბიციის დასასრული არ არის,"— განაცხადა მირზოიანმა, რომელიც სომხეთის მარშში მიღებულ კანონზე მიუთითებდა, რომელიც ევროკავშირში გაწევრიანების პროცესის დაწყებას ეხებოდა.

"დღევანდელი შეხვედრის გზავნილი ნათელია — სომხეთ–ევროკავშირის პარტნიორობა შედის ახალ და უფრო ამბიციურ ფაზაში, საერთო ხედვითა და საერთო პასუხისმგებლობით, რათა ჩვენს მოქალაქეებს რეალური შედეგები მოვუტანოთ," — აღნიშნა მირზოიანმა.

ბოლოს, კოსმა განაცხადა, რომ რეგიონული კავშირებისათვის საჭირო ინფრასტრუქტურის შესაქმნელად, სპეციალური ოთხმხრივი სამუშაო ჯგუფის შექმნაზე — სომხეთი, აზერბაიჯანი, თურქეთი და ევროკავშირი — მსჯელობა მიმდინარეობს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.