ცოტა ხნის წინ იაპონიის ერთ-ერთ ყველაზე მშვიდ ქალაქში, კუმამოტოში, ასეთ სანახაობას შეესწრებოდით: დამცავი ჩაფხუტებითა და სპორტული ფეხსაცმლით აღჭურვილი ათობით კომპანიის თანამშრომელი საოფისე სკამებზე მოკალათებულა. ისინი თვალს არ აშორებენ სასტარტო ხაზს და რბოლისთვის ემზადებიან.

ფოტო: Reuters

ისმის საყვირის ხმა და რბოლის მონაწილეებიც ადგილს სწყდებიან: ფეხის ყველა კუნთს ძაბავენ და მიწას ფეხს ჰკრავენ, რათა უკუსვლით იმოძრაონ. სანამ მრბოლელები ქუჩებში მიქრიან, ფონად მაყურებლის შეძახილი ისმის.

ჩვეულებრივი სპორტი არ გეგონოთ — ეს საოფისე სკამების რბოლაა. თამაშის წესების მიხედვით, სამი ადამიანისგან შემდგარი გუნდი ცდილობს, წრიულ გზას რაც შეიძლება მეტი წრე დაარტყას.

საოფისე სკამების რბოლის იდეა ცუიოში ტაჰარას ეკუთვნის, შეჯიბრება კი პირველად 2010 წელს ქალაქ კიოტანაბეში გაიმართა. მისთვის შთაგონება ის მასწავლებელი გახდა, რომელმაც ბავშვობაში საოფისე სკამით თამაშის გამო უსაყვედურა.

ფოტო: Reuters

მას შემდეგ ეს სპორტი მთელს ქვეყანას მოედო. ყოველწლიურად შეჯიბრება 10 ქალაქში ტარდება, მათ შორის ტოკიოში, კიოტოსა და სიძუოკაში. თანაც, მონაწილეობის მისაღებად თანამშრომლებს ისეთი მსხვილი კომპანია გზავნის, როგორიცაა Toyota.

ფოტო: Reuters

"მთავარი ისაა, რომ მონაწილეობა ნებისმიერ მსურველს შეუძლია. მთელს მსოფლიოში უამრავი ადამიანი ოფისებში თავდაუზოგავად შრომობს და ჩვენ გვინდა, რომ მათ იქაურობას თავი დააღწიონ", — ამბობს ტაჰარა.

გაინტერესებთ, რა არის მთავარი პრიზი? — 90 კილოგრამი ბრინჯი. თუმცა, არსებობს სხვადასხვა ვარიაციებიც, მაგალითად, ტოკიოში გამარჯვებულს გადასცემენ 5 კილოგრამ თინუსს.

"იაპონიაში ადამიანები შესაძლოა ძალიან ბევრს მუშაობენ, თუმცა მათ მაინც შეუძლიათ მსგავს სისულელეში ჩაერთონ და ზრდასრულ ასაკშიც მიიღონ სიამოვნება", — აღნიშნავს ის.

ფოტო: Reuters

ფორმულა 1 (ოფისის ვერსია)

აღსანიშნავია, რომ საოფისე სკამების რბოლა ბევრ რამეში ჰგავს ფორმულა 1-ის რბოლებს.

F1-ის მსგავსად, აქაც მნიშვნელოვანია თავად ტრანსპორტი. ზოგიერთი უპირატესობას ანიჭებს მსუბუქ სკამებს პატარა საზურგით, ტაჰარა კი ირჩევს რეგულირებადი სიმაღლის, დიდი ბორბლებისა და მოკლე ღერძის მქონე სკამებს.

ფოტო: formula 1

ფოტო: Reuters

ტაჰარას იმედი აქვს, ერთ დღეს საოფისე სკამების რბოლას მონაკოს ქუჩებში გამართავს. ქუჩებში, რომლებშიც F1-ის საყურებლად ყოველწლიურად მსოფლიოს უმდიდრესი და ცნობილი ადამიანები იკრიბებიან.