კრემლის ინფორმაციით, ვლადიმერ პუტინმა სააღდგომოდ უკრაინაში ცეცხლის დროებით შეწყვეტის ბრძანება გასცა — ცეცხლის შეწყვეტა 11 აპრილის 16:00 საათიდან დაიწყება და 12 აპრილის დღის ბოლომდე გაგრძელდება.

პუტინმა რუსეთის თავდაცვის მინისტრს, ანდრეი ბელუსოვს და შეიარაღებული ძალების გენერალური შტაბის უფროსს, ვალერი გერასიმოვს ამ პერიოდში ყველა მიმართულებით საბრძოლო მოქმედებების შეწყვეტა დაავალა.

კრემლის განცხადებაში ვკითხულობთ, რომ "სამხედრო ნაწილები მზად უნდა იყვნენ მოწინააღმდეგის მხრიდან შესაძლო პროვოკაციების, ასევე ნებისმიერი აგრესიული ქმედებების მოსაგერიებლად".

ცნობისთვის, ვოლოდიმირ ზელენსკიმ "სააღდგომო ზავთან" დაკავშირებით განაცხადა, რომ "მზად არიან სარკისებური ნაბიჯებისთვის".

"უკრაინამ არაერთხელ განაცხადა, რომ მზად ვართ "სარკისებური" (შესაბამისი) ნაბიჯების გადასადგმელად. წელს აღდგომის დღესასწაულზე ცეცხლის შეწყვეტა შევთავაზეთ და შესაბამისად ვიმოქმედებთ," — წერს ვოლოდიმირ ზელენსკი.