ტექნოლოგიებითა და ინჟინერიით დაინტერესებული სკოლის მოსწავლეებისთვის საქართველოს ბანკი, კომაროვის სკოლასთან თანამშრომლობით საქართველოში ყველაზე მასშტაბურ სასკოლო, გუნდურ შეჯიბრება — STEM ოლიმპიადას ატარებს.

პროექტის მიზანია, ხელი შეუწყოს მოსწავლეებში STEM მიმართულებების პოპულარიზაციას, მისცეს მათ შესაძლებლობა, გამოავლინონ საკუთარი პოტენციალი და გადადგან პირველი ნაბიჯები მომავლის პროფესიებში.

საქართველოს ბანკისა და კომაროვის სკოლის STEM ოლიმპიადაში მონაწილეობა უკვე 400-ზე მეტი სკოლის, 2000-ზე მეტმა მოსწავლემ მიიღო.

STEM ოლიმპიადა სამ ეტაპად ტარდება. პირველ ეტაპზე ონლაინ შესარჩევი ტური იმართება, რომლის ფარგლებშიც მონაწილეები წერენ ტესტს, საუკეთესო შედეგის მქონე გუნდები (მონაწილე გუნდების 50%) კი პირველ ტურში გადადიან.

პირველი ტური დასწრებულად ტარდება, რომელშიც ონლაინ შესარჩევი ტურის შედეგების მიხედვით შერჩეული გუნდები მონაწილეობენ. თითოეული გუნდი დაკომპლექტებულია 5 მოსწავლისგან, რომელთაგან სამი წერს მათემატიკის, ორი კი, ფიზიკის საოლიმპიადო ამოცანებს. ჯამური შედეგებიდან გამომდნარე ვლინდება 10 საუკეთესო შედეგის მქონე სკოლის გუნდი და ისინი მონაწილეობას ფინალში იღებენ.

ფინალურ ეტაპზე მოსწავლეები ერთმანეთს გუნდურად, პრაქტიკული დავალებების შესრულებაში ეჯიბრებიან და STEM პროექტზე მუშაობენ.

ამასთან, ფინალურ ტურამდე მონაწილე გუნდებს 40 საათიანი ციფრული ინჟინერიისა და პროგრამირების კურსი უტარდებათ, რომელსაც კომაროვის სკოლის STEM მიმართულების პროფესიონალები უძღვებიან.

აღსანიშნავია, რომ წელს STEM ოლიმპიადის ონლაინ შესარჩევ ტურში მონაწილეობა 160 სკოლის 800-ზე მეტმა მოსწავლემ მიიღო. მათგან საუკეთესო შედეგის მქონე 63 გუნდი პირველ ტურში გადავიდა. STEM ოლიმპიადის ნახევარფინალის ფარგლებში კი 10 ფინალისტი გუნდი გამოვლინდა.

ოლიმპიადის გამარჯვებულ გუნდს კი საქართველოს ბანკისგან გადაეცემა ფულადი პრიზი.

ოლიმპიადის შესახებ დეტალური ინფორმაციის მისაღებად ეწვიეთ ბმულს.

ინფორმაციისთვის, საქართველოს ბანკი, კომაროვის სკოლასთან ერთად, უკვე ოთხ წელზე მეტია STEM ოლიმპიადას ატარებს. პროექტი, ფიზიკით, მათემატიკით, საბუნებისმეტყველო მეცნიერებებითა და ინჟინერიით დაინტერესებული მოსწავლეებისთვის STEM მიმართულებით განათლების შესაძლებლობების შექმნას ისახავს მიზნად.

საქართველოს ბანკის მიერ განხორციელებული საგანმანათლებლო პროექტების შესახებ დეტალური ინფორმაციის მისაღებად ეწვიეთ ვებგვერდს.