კლასიკად ქცეულმა სიტკომმა, Friends-მა, შესაძლოა, დიდ წარმატებას მიაღწია, თუმცა სერიალში მონაწილე მსახიობების კარიერაზე ამ ფაქტს მყისიერი გავლენა არ ჰქონია. ყოველ შემთხვევაში — ლიზა კუდროუსთვის.

The Independent-თან საუბრისას ლიზამ აღნიშნა, რომ სერიალის ასეთი წარმატების მიუხედავად, ამ ყველაფერს მის კარიერულ წინსვლაზე დიდად არ უმოქმედია. მსახიობმა თქვა, რომ ის ექვსეულის თითქოს ყველაზე დაჩრდილული წევრი იყო.

ფოტო: Getty Images

"ჩემით არავინ ინტერესდებოდა", — ამბობს ლიზა კუდროუ — "სამსახიობო სააგენტოების გარკვეული ნაწილიც უბრალოდ 'მეექვსე მეგობრად' მომიხსენიებდა".

მსახიობის თქმით, ვერავინ ხედავდა მის პოტენციალს და არც მოლოდინები ჰქონდათ იმის შესახებ, როგორი კარიერა შეიძლებოდა ჰქონოდა. კუდროუ იხსენებს, რომ ხალხი ძირითადად სერიალს აქებდა — "ჩემზე ამბობდნენ ხოლმე რა იღბლიანია, რომ საერთოდ ამ სერიალში მოხვდაო".

ფოტო: MARK SELIGER

რაც შეეხება კუდროუს სამსახიობო კარიერას, სერიალის სტაბილურობამ მას სხვადასხვა როლების შესრულების თავისუფლება მისცა, მათ შორის ალბერტ ბრუკსის კომედიაში Mother, ფილმში Clockwatchers, Analyze This და ა.შ.

თუმცა, Friends-ის წარმატებამ კუდროუს კარიერას კიდევ ერთი სირთულე გაუჩინა. მას შემდეგ, რაც NBC დათანხმდა, სერიალის მთავარი პერსონაჟებისთვის თითოეულ სერიაში ერთი მილიონი დოლარი გადაეხადა, გავრცელდა ხმები, თითქოს კუდროუმ მოუწოდა კოლეგებს, მოლაპარაკებები კოლექტიურად ეწარმოებინათ.

ფოტო: Kevin Winter / Getty Images

"მე ნამდვილად არ ვყოფილვარ ამის ინიციატორი",— აღნიშნა კუდროუმ — "ეს სიმართლეს არ შეესაბამებოდა. ამის გამო ჩემი გუნდი ძალიან გაბრაზდა".

იმ დროს კუდროუ ფიქრობდა, რომ გავრცელებული ჭორები მისთვის სარგებლის მომტანი იქნებოდა. "ვიფიქრე, ხალხი ჩათვლითა, ძალიან ჭკვიანი ვარ", — იხსენებს კუდროუ — "თუმცა, ჩემი გუნდი მეუბნებოდა: 'არა, ეს ნამდვილად არ არის კარგი. ძალიან ვბრაზობთ, შენზე რომ ამას ამბობენ".

ფოტო: NBC

ამის მიუხედავად, Friends-ის წარმატებამ კუდროუს მისცა შესაძლებლობა, მონაწილეობა მიეღო მისთვის საინტერესო პროექტებში.

"რადგან Friends-ში ვთამაშობდი, მომეცა საშუალება შემექმნა საკუთარი სერიალები, რომლებიც არ მოითხოვდა Friends-ის მსგავს მასშტაბურობას" — განმარტა მან — "ძალიან დიდ კმაყოფილებას მანიჭებდა ის, რომ შემეძლო ისეთი სერიალები შემექმნა, როგორებიცაა — The Comeback და Web Therapy".