მოდის ინდუსტრიის ერთ-ერთმა ყველაზე გავლენიანმა დუეტმა საკუთარი კოლექცია წარადგინა. ზენდეიამ და ლო როუჩმა, რომლებმაც გასულ წელს ბრენდ On-თან ერთად კედები (Cloudzone Moon) შექმნეს, სპორტული ფეხსაცმლისა და ტანსაცმლის მწარმოებელ კომპანიასთან კვლავ ითანამშრომლეს. ამჯერად მათ სრული ხაზი გამოუშვეს.

ზენდეია On-ისთვის

ფოტო: On

ახალ კოლექციაში წარმოდგენილია სპორტული და მოსასვენებელი სამოსი, მათ შორის: "რიბანა" მაისურები, "პარაშუტი" შარვლები და ახალი სარბენი ფეხსაცმელი — Cloudnova Moon. პროდუქცია ბრენდის ოფიციალურ საიტზე 16 აპრილიდან იქნება ხელმისაწვდომი.

კოლექციის წარსადგენად სპეციალური ვიდეორგოლი მოამზადეს, რომლის სცენარის ავტორი და რეჟისორი სპაიკ ჯონზია. სამწუთიანი ვიდეოს დასაწყისში მსახიობი თეთრ ოთახში მარტო დგას, რის შემდეგაც მის ზურგს უკან მოცეკვავეთა ჯგუფი ჩნდება, ყველა მათგანს On-ის თეთრი ფორმები აცვია. ვიდეო პროპორციებით თამაშობს: ეკრანიდან გამოსული ხელები ზენდეიასა და მოცეკვავეების მინიატურულ ვერსიებს გადაადგილებენ და "ეთამაშებიან". მოგვიანებით კადრში ლო როუჩიც ჩნდება, რომელიც თავის მუზას ახალი კოლექციის სამოსს არგებს.

"ლოუსთან და On-ის გუნდთან ერთად ამ საბაზისო სამოსზე მუშაობა ძალიან სასიამოვნო იყო," — აღნიშნა ზენდეიამ განცხადებაში — "გვინდოდა შეგვექმნა მრავალფეროვანი და კომფორტული მოდელები, რომლებიც ნებისმიერ მომენტში გამოგადგებათ. ჩვენი მიზანი იყო, ადამიანებს თავდაჯერებულობა და სიმსუბუქე ეგრძნოთ. სპაიკმა ეს ხედვა განსაკუთრებული ფორმით გააცოცხლა."

ეს კოლექცია ზენდეიასა და ბრენდ On-ის მრავალწლიანი პარტნიორობის მორიგი ეტაპია. ვარსკვლავისთვის აპრილი საკმაოდ დატვირთული თვეა: ეკრანებზე გამოდის A24-ის ფილმი დრამა, სადაც ის რობერტ პატინსონთან ერთად თამაშობს, ხოლო ამ პარასკევს ეიფორიას დიდი ხნის ნანატრი მესამე სეზონის პრემიერა შედგება.