ირანის ისლამური რევოლუციის გუშაგთა კორპუსის სამხედრო-საზღვაო ძალებმა გამოაქვეყნეს რუკა, რომელიც ჰორმუზის სრუტეში ალტერნატიულ სანაოსნო მარშრუტებს ასახავს, რათა ტრანზიტულმა გემებმა თავი აარიდონ საზღვაო ნაღმებს — ამის შესახებ ინფორმაციას ირანული მედიაზე დაყრდნობით The Jerusalim Post ავრცელებს.

ჰორმუზის სრუტის სტატუსი მას შემდეგ გაურკვეველია, რაც ირანულმა მედიასაშუალებებმა ურთიერთგამომრიცხავი ცნობებიგაავრცელეს იმის შესახებ, ეძლეოდათ თუ არა ნავთობტანკერებს გავლის უფლება.

ირანული სახელმწიფო ტელეკომპანია Press TV-ის თანახმად, სრუტე სრულად ჩაიკეტა და ყველა ტანკერი, რომელიც გადასვლას ცდილობდა, უკან გააბრუნეს.

Press TV-ის მიერ ჩაკეტვის შესახებ ცნობების გამოცხადებამდე ცოტა ხნით ადრე, ირანის სახელმწიფო "სტუდენტურმა საინფორმაციო ქსელმა" (SSN) გაავრცელა ინფორმაცია, რომ ჰორმუზის სრუტეში უსაფრთხო გავლის მარშრუტებია დადგენილი, რომლებიც გემებმა ირანის ისლამური რევოლუციის გუშაგთა კორპუსთან (IRGC) კოორდინაციით უნდა გამოიყენონ.

ორგანიზაციის განცხადებით, უსაფრთხო შესასვლელი გზა გადის ომანის ყურიდან კუნძულ ლარაკის ჩრდილოეთით, ხოლო ყურიდან გამოსასვლელი უსაფრთხო გზა გადის კუნძულ ლარაკის სამხრეთით, ომანის ყურის მიმართულებით.

სამშაბათს, 7 აპრილს, გვიან ღამით, აშშ-ის პრეზიდენტმა დონალდ ტრამპმა ირანის წინააღმდეგ დაგეგმილი მასშტაბური სამხედრო იერიშის გადაწყვეტილება შეცვალა. ეს ნაბიჯი ვაშინგტონსა და თეირანს შორის ორკვირიან ცეცხლის შეწყვეტის შეთანხმებას მოჰყვა, რომელიც, სხვა საკითხებთან ერთად, სტრატეგიულად მნიშვნელოვანი ჰორმუზის სრუტის განბლოკვასაც ითვალისწინებს. ამის შესახებ ინფორმაციას Associated Press (AP) ავრცელებს.

მათი განმარტეით, ტრამპმა ომის დეესკალაციისკენ კურსი თეირანისთვის დაწესებული ულტიმატუმის ვადის ამოწურვამდე ორ საათზე ნაკლებ დროში აიღო. მანამდე ის ირანს კაპიტულაციას სთხოვდა. წინააღმდეგ შემთხვევაში ის ხიდებსა და ელექტროსადგურებზე თავდასხმით იმუქრებოდა და "ცივილიზაციის განადგურებაზე" საუბრობდა.

ირანის ეროვნული უშიშროების უმაღლესმა საბჭომ განაცხადა, რომ ქვეყანა ცეცხლის შეწყვეტას დათანხმდა და პარასკევიდან პაკისტანში შეერთებულ შტატებთან მოლაპარაკებებს დაიწყებს. არც ირანს და არც აშშ-ს არ დაუკონკრეტებიათ, ზუსტად როდის დაიწყებოდა ზავი; 8 აპრილს, დილით ისრაელში, ირანსა და სპარსეთის ყურის რეგიონში თავდასხმები მაინც დაფიქსირდა.

შეგახსენებთ, ტრამპმა ჰორმუზის სრუტის გახსნის ვადები რამდენჯერმე გაახანგრძლივა. 21 მარტს ტრამპი ირანს ელექტროსადგურების განადგურებით პირველად დაემუქრა, თუ სრუტე 48 საათში "სრულად არ გაიხსნებოდა". ორი დღის შემდეგ მან თქვა, რომ დარტყმებს კიდევ ხუთი დღით — 28 მარტამდე გადადებდა, სანამ ირანთან "კარგი" და "პროდუქტიული" მოლაპარაკებები გრძელდებოდა. ირანმა ოფიციალურ პირებსა და ტრამპის ადმინისტრაციას შორის რაიმე სახის კონტაქტი უარყო. აღნიშნული თარიღის მოახლოებისას ტრამპმა ბოლო ვადა კიდევ 10 დღით, 6 აპრილამდე გადასწია.

6 აპრილს ირანმა აშშ-ის 10-პუნქტიანი სამშვიდობო გეგმა შესთავაზა. ამის შესახებ ინფორმაცია ირანის სახელმწიფო მედიაზე დაყრდნობით The New York Times-მაგაავრცელა. გეგმა პაკისტანის მეშვეობით გადაიცა, რომელიც კონფლიქტში მთავარი შუამავლის როლს ასრულებს.

ორშაბათს, 6 აპრილს თეთრ სახლში გამართულ პრესკონფერენციაზე ტრამპმა კიდევ ერთხელ გაიმეორა მუქარა, რომ თუ მისი პირობები7 აპრილს, აღმოსავლეთის დროით საღამოს 8 საათამდე არ შესრულდება, ის ირანის მასშტაბით დამანგრეველი საჰაერო დარტყმების შესახებ ბრძანებას გასცემდა.

ცნობისთვის, 8 თებერვალს ისრაელმა და ამერიკის შეერთებულმა შტატებმა ირანის სხვადასხვა ობიექტზე კოორდინირებული ერთობლივი იერიში მიიტანეს. ოპერაციას ისრაელის მხრიდან "ლომის ღრიალი", ხოლო აშშ-ის თავდაცვის დეპარტამენტის მიერ — "ეპიკური მრისხანება" ეწოდა.

თავდასხმის სამიზნეს მაღალჩინოსნები, სამხედრო მეთაურები და სტრატეგიული ობიექტები წარმოადგენდნენ. იერიშები მიზნად რეჟიმის შეცვლას ისახავს. იერიშის შედეგად მოკლულია ირანის უმაღლესი ლიდერი აიათოლა ალი ხამენეი.
მედიაში გავრცელებული ცნობებით, ირანის ახალ სულიერ ლიდერად ალი ხამენეის ვაჟი მოჯტაბა აირჩიეს. "ადამიანის უფლებათა დამცველების საინფორმაციო სააგენტოს" (HRANA) მონაცემებით, 2026 წლის დასაწყისისთვის ირანში მიმდინარე საპროტესტო აქციების დროს დაღუპულთა რაოდენობა მკვეთრად გაიზარდა და მსხვერპლთა რიცხვმა 6 000-ს გადააჭარბა.