ამერიკის შეერთებული შტატების პრეზიდენტმა, დონალდ ტრამპმა სოციალურ ქსელში დაწერა, რომ ყველა დოკუმენტს, მათ შორის შეწყალებებს, რომლებსაც, მისი თქმით, ჯო ბაიდენმა Autopen-ის გამოყენებით მოაწერა ხელი, აუქმებს.

"ჯოზეფ რ. ბაიდენ უმცროსის ადმინისტრაციის ფარგლებში უკვე ცნობილი და არაავტორიზებული AUTOPEN-ის ბრძანებით ხელმოწერილი ნებისმიერი დოკუმენტი, პროკლამაცია, აღმასრულებელი ბრძანება, მემორანდუმი ან კონტრაქტი ამ მომენტიდან ბათილია და ძალას კარგავს. ყველას, ვინც მიიღო მსგავსად ხელმოწერილი "შეწყალება", "შემსუბუქება" ან სხვა იურიდიული დოკუმენტი, გთხოვთ, გაითვალისწინოთ, რომ აღნიშნული დოკუმენტი სრულად შეწყვეტილია და იურიდიულ ძალას არ ატარებს. გმადლობთ ამ საკითხისადმი თქვენი ყურადღებისთვის!" — დაწერა დონალდ ტრამპმა Truth social-ზე.

ტრამპმა და მისმა მხარდამჭერებმა რამდენჯერმე გააჟღერეს ბრალდებები იმის თაობაზე, რომ ბაიდენის მიერ ამ მოწყობილობის გამოყენებამ მის პრეზიდენტობის პერიოდში თითქოს გააუქმა მისი ნაბიჯების კანონიერება ან მიუთითებდა იმაზე, რომ იგი სრულად ვერ აკონტროლებდა ამ ქმედებებს.

ცნობისთვის, Autopen გამოიყენება პირის ხელმოწერის მაღალი სიზუსტით გასამეორებლად, როგორც წესი, დიდი რაოდენობის ან ცერემონიალური დოკუმენტებისთვის. მას სხვადასხვა პარტიის პრეზიდენტები წერილებსა და პროკლამაციებზე ხელმოსაწერად, წლების განმავლობაში იყენებდნენ.