ოცნების დანიშნული პრეზიდენტი Deutsche Welle-სთან ინტერვიუში ამბობს, რომ ქართული ოცნების მთავრობას არასდროს უთქვამს უარი ევროკავშირში გაწევრიანებაზე.

"სამწუხაროდ, როგორც არ უნდა შევხედოთ ამ საკითხს, მხარდაჭერა დღეს უფრო ნაკლებია. დავფიქრდეთ, თუ საქართველოს მოსახლეობის 80 პროცენტი ევროკავშირში გაწევრიანებას უჭერს მხარს, ხოლო 60 პროცენტი — ქართული ოცნებას, რას ნიშნავს ეს? გამოდის, რომ მოსახლეობის უმრავლესობა ერთდროულად მხარს უჭერს როგორც ევროკავშირში გაწევრიანებას, ისე ქართული ოცნებას. მაშინ, რა განსხვავებაა ამ ორ ფაქტს შორის?", — განაცხადა საქართველოს პრეზიდენტმა.

შეგახსენებთ, რომ 2024 წლის 28 ნოემბერს ოცნების პრემიერმა ირაკლი კობახიძემ ბრიფინგზე განაცხადა, რომ მიიღეს გადაწყვეტილება, "2028 წლის ბოლომდე დღის წესრიგში არ დააყენონ ევროკავშირთან მოლაპარაკების გახსნის საკითხი".

"მივიღეთ გადაწყვეტილება, 2028 წლის ბოლომდე დღის წესრიგში არ დავაყენოთ ევროკავშირთან მოლაპარაკების გახსნის საკითხი. ასევე, 2028 წლის ბოლომდე უარს ვამბობთ ყოველგვარ საბიუჯეტო გრანტზე ევროკავშირის მხრიდან", — განაცხადა კობახიძემ.