"შარშანდელი აქციების დროს უსაშინელესი ქიმიური ნივთიერებები იყო გამოყენებული", — ამის შესახებ სოციალურ ქსელში სახალხო დამცველის ყოფილი მოადგილე გიორგი ბურჯანაძე წერს და BBC-ის გამოძიებას ეხმაურება, რომელშიც ნათქვამია, რომ 2024 წელს ქართული ოცნების რეჟიმმა პროევროპული საპროტესტო აქციების დასარბევად პირველი მსოფლიო ომის დროინდელი ქიმიური იარაღი გამოიყენა.

ის ამბობს, რომ "პირადი გამოცდილება და BBC-ის მტკიცებულებები აძლევს იმის საფუძველს, რომ დაიჯეროს ის, რაც დღეს გამოქვეყნებულ სტატიაში წერია".

"შარშანდელი აქციების დროს უსაშინელესი ქიმიური ნივთიერებები იყო გამოყენებული. როგორც გაზაფხულზე, ისე განსაკუთრებით შემოდგომა/ზამთრის დროს. რამდენჯერმე ლამის გავითიშე და სხვა დამეხმარა გასვლაში. ყელის, თვალების, სახის წვას აღარ ვამბობ, რაც მუდმივად იყო ყოველ საღამოს. ჩემი ჯანმრთელობა შეიცვალა მაგის შემდეგ.

ყოველ საღამოს წინა ღამეს გამოყენებული ნივთიერების შემდეგ, რუსთაველის გამზირის რამდენიმე ადგილას ისეთი მძაფრი სუნი იდგა დღეების მანძილზე, რომ გავლისას თვალები და სასუნთქი გზები გვეწვოდა ყველას.

ჩემი პირადი გამოცდილება და BBC-ის მტკიცებულებები სრულად მაძლევს იმის საფუძველს რომ დავიჯერო რაც დღეს გამოქვეყნებულ სტატიაში წერია.

ივანიშვილის რაზმებმა საქართველოს ისტორიაში უპრეცედენტო წამება ჩაიდინეს რუსთაველის გამზირზე მანიფესტანტების წინააღმდეგ. როგორც ამ ჟურნალისტური გამოძიებით გამოჩნდა, უპრეცედენტო არაადამიანური მოპყრობა და სხვა შესაძლო საერთაშორისო სისხლისსამართლებრივი დანაშაულებიც ჩაუდენიათ ქიმიური ნივთიერებების გამოყენებით", — წერს ბურჯანაძე.