ნავთობინდუსტრიის მონიტორინგის არასამთავრობო ორგანიზაცია Oil Change International-ის მონაცემებით, ღაზის ომის პერიოდში ისრაელის ნედლი ნავთობის იმპორტის 40% აზერბაიჯანიდან იყო შემოსული.

ორგანიზაციამ ანგარიში COP30-ის — გაეროს წლიური კლიმატის სამიტის — პარალელურად გამოაქვეყნა.

დოკუმეტში წერია, რომ აზერბაიჯანმა (თურქეთის მეშვეობით) და ყაზახეთმა (რუსეთის მეშვეობით) ისრაელს 2023 წლის ნოემბრიდან 2025 წლის ოქტომბრამდე პერიოდში ნედლი ნავთობის დაახლოებით 70% მიაწოდეს. აზერბაიჯანული ნავთობი 7 მილიონ ტონაზე მეტი ნავთობით ლიდერობდა, რაც მთლიანად იმპორტირებული მოცულობის თითქმის 40%-ს შეადგენს. ანგარიშის მიხედვით, ამ პერიოდში ბაქო–თბილისი–ჯერხანის (BTC) მილსადენით განხორციელებული 61 პარტია აზერბაიჯანული ნავთობის საბუთებში წარმოშობის ქვეყნად თურქეთი ფიქსირდებოდა.

მეორე ადგილზე ყაზახეთი იყო, რომელმაც რუსეთიდან ისრაელს დაახლოებით 5.3 მილიონი ტონა ნავთობი მოაწოდა.

ანგარიშში დოქტორ ირინა პიეტროპაულის სამართლებრივი ანალიზია მოყვანილი, რომელშიც აღნიშნულია, რომ ქვეყნებმა, რომლებიც აზერბაიჯანს ნედლ ან გადამუშავებულ ნავთობს აწვდიან, უნდა "გააცნობიერონ, რომ ისრაელის სამხედრო ოპერაციებში მათი სამხედრო ან სხვა ტიპის ხელშეწყობამ, გენოციდის კონვენციის შესაბამისად, ისინი შესაძლოა გენოციდში თანამონაწილეობის რისკის წინაშე დააყენოს."

დასკვნით ნაწილში აღნიშნულია, რომ ის სახელმწიფოები, რომლებიც ისრაელს ომის მიმდინარეობისას საწვავს აწვდიდნენ, ამას "მისი ბარბაროსობის გაცნობიერებით" აკეთებდნენ.

აზერბაიჯანსა და ისრაელს მჭიდრო ურთიერთობები აქვთ: ბაქო ისრაელს ენერგიას აწვდის, ხოლო სანაცვლოდ თანამედროვე შეიარაღებას იღებს.

მიუხედავად იმისა, რომ ისრაელი უფრო და უფრო მწვავე საერთაშორისო კრიტიკის ობიექტი ხდება ღაზაში ომის მიმდინარეობისას აზერბაიჯანი კიდევ უფრო აძლიერებს მასთან კავშირს, განსაკუთრებით სახელმწიფო ნავთობკომპანია SOCAR-ის მეშვეობით.

ივნისში SOCAR-მა "თამარის" საბადოში 10%-იანი წილი შეიძინა — ეს ერთ-ერთი უდიდესი გაზის საბადოა ისრაელში, ჰაიფადან 90 კილომეტრში.

ამ გარიგების სავარაუდო ღირებულება 1.25 მილიარდ დოლარს შეადგენს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.