ამერიკელი კონგრესმენი ჯო უილსონი ანაკლიაში გაკეთებულ 380-მეტრიან გეოგლიფს ეხმაურება, რომელიც ადგილობრივ და საერთაშორისო საზოგადოებას "მეგობარი აქტის" მნიშვნელობას ახსენებს:

"საქართველო ორი ძალის მიერ არის ოკუპირებული: რუსეთისა და რუსეთ-ჩინეთის მარიონეტული ქართული ოცნების მიერ. აშშ-სა და ქართველ ხალხს შორის მეგობრობა, რომელიც თავისუფლების სიყვარულითაა დაკავშირებული, ურყევია. MEGOBARI [აქტის] მიღება — რაც მეგობარს ნიშნავს ქართულად — ამ სიმართლის დასტური იქნებოდა!", — წერს უილსონი X-ზე.

აქტივისტებმა ანაკლიის პორტის პროექტის მიმდებარედ, მინდორზე, მასშტაბური წარწერა – Megobari act გუშინ გააკეთეს. მათი თქმით, რომ არა ქართული ოცნების ანტიდასავლური პოლიტიკა, ანაკლია მასშტაბური პროექტის ადგილი იქნებოდა.

"380 მეტრი სიგრძის გეოგლიფი ანაკლიის სანაპიროდან. ადგილიდან, რომელიც რომ არა ქ*ცების მოღალატეობრივი, ანტიდასავლური პოლიტიკა, მასშტაბური პროექტის ადგილი იქნებოდა და გააუმჯობესებდა ქვეყნის ეკონომიკურ მდგომარეობასაც და საერთაშორისო პოლიტიკურ მნიშვნელობასაც", — წერს აქტივისტი, ზუგდიდის საპროტესტო აქციების მონაწილე, ცაბუნია ვართაგავა.