ევროპის წამყვანი მინისტრები მომავალ თვეში უკრაინას ესტუმრებიან, რათა მხარი დაუჭირონ ქვეყნის განაცხადს ევროკავშირში გაწევრიანების შესახებ. სამიტის მიზანია ქვეყნის გაწევრიანების პროცესის დაჩქარება და ბუდაპეშტის მიერ შექმნილი ბარიერების მოხსნა. ინფორმაციას Politico ავრცელებს.

როგორც დედაქალაქებისთვის გაგზავნილ მოწვევაშია აღნიშნული, ევროპის საკითხთა მინისტრების არაფორმალური სამიტი დასავლეთ უკრაინაში, ლვოვში, 10–11 დეკემბერს გაიმართება.

"ჩვენი დისკუსიების მთავარი თემა იქნება უკრაინის პროგრესი ევროკავშირში გაწევრიანების გზაზე...შეხვედრა საშუალებას მოგვცემს შევაფასოთ უკვე მიღწეული შედეგები, განვსაზღვროთ შემდეგი ნაბიჯები და განვაახლოთ პოლიტიკური მხარდაჭერა უკრაინის რეფორმებისა და ინტეგრაციის პროცესის მიმართ...იმით, რომ უკრაინაში ვიკრიბებით, ჩვენ ვაგზავნით მკაფიო და ერთიან პოლიტიკურ სიგნალს: უკრაინის მომავალი ევროკავშირშია," — ნათქვამია წერილში.

ლვოვის შეხვედრის გეგმები იმ ფონზე გაჩნდა, როცა ბრიუსელი კვლავ ცდილობს დაპირებების შესრულებას — მათ შორის, 140 მილიარდი ევროს ოდენობის სესხის მხარდაჭერას გაყინული რუსული აქტივების გამოყენებით, რასაც ბელგიის პოზიცია აფერხებს.