დღეს, 9 ნოემბერს, უკრაინის პრეზიდენტმა ვოლოდიმირ ზელენსკიმ ხელი მოაწერა დადგენილებას, რომლის მიხედვითაც სანქციები დაუწესდათ უკრაინის საკონსტიტუციო სასამართლოს ყოფილ თავმჯდომარეს, ალექსანდრ ტუპიცკის, ასევე ვლადიმირ პუტინის გარემოცვის წევრებს, მათ შორის მის სპეციალურ წარმომადგენელსა და რუსეთის პირდაპირი ინვესტიციების ფონდის ხელმძღვანელს, კირილ დმიტრიევს. ამის შესახებ ინფორმაციას უკრაინული მედია ზელენსკის განკარგულებაზე დაყრდნობით ავრცელებს.

"დღევანდელი სანქციები პუტინის სამთავრობო სტრუქტურებში მომუშავე პირებსა და დროებით ოკუპირებული უკრაინის ტერიტორიების ძარცვაში მონაწილე პირებს მოიცავს. ასევე, ჩვენ მუშაობას ვიწყებთ რუსული გამომცემლობების წინააღმდეგ, რომლებიც მთელ მსოფლიოში აგრესიას ამართლებენ და რუსულ პროპაგანდას ავრცელებენ", — განაცხადა ვოლოდიმირ ზელენსკიმ.

პრეზიდენტმა ასევე უპასუხა რუსეთის მიერ უკრაინის ოფიციალური პირებისთვის დაწესებულ სანქციებს და განაცხადა, რომ ეს კიდევ უფრო ზრდის საერთაშორისო ზეწოლის აუცილებლობას. ზელენსკიმ აღნიშნა, რომ ის თავის პარტნიორებს ახალ სანქციებზე წინადადებებს გააცნობს.