პენტაგონმა თეთრ სახლს ნებართვა მისცა, იმსჯელოს უკრაინისთვის შორ მანძილზე მოქმედი "ტომაჰავკის" ტიპის რაკეტების გაგზავნაზე. პენტაგონმა ეს გადაწყვეტილება მას შემდეგ მიიღო, რაც შეაფასა, რომ ეს ნაბიჯი აშშ-ის იარაღის მარაგებზე უარყოფით გავლენას არ მოახდენს. საბოლოო პოლიტიკური გადაწყვეტილება პრეზიდენტ დონალდ ტრამპზეა დამოკიდებული.

ტრამპმა ოქტომბრის დასაწყისში, თეთრ სახლში გამართული სამუშაო სადილის დროს უკრაინის პრეზიდენტ ვოლოდიმირ ზელენსკისთან განაცხადა, რომ მას არ სურს ამ რაკეტების გადაცემა, რადგან "არ სურთ ისეთი რამ გააჩუქონ, რაც მათი ქვეყნის დაცვას სჭირდება".

უკრაინის ლიდერი აქტიურად მოითხოვდა "ტომაჰავკებს", რათა საშუალება ჰქონოდა რუსეთზე, მათ შორის ენერგოობიექტებზე, უფრო შორ მანძილზე განეხორციელებინა დარტყმები. ამ რაკეტების მოქმედების რადიუსი დაახლოებით 1,000 მილია.

ეს ინფორმაცია ოპტიმისტურად შეაფასეს ამერიკის ევროპელმა მოკავშირეებმა, რომლებიც მიიჩნევენ, რომ ახლა ვაშინგტონს ნაკლები მიზეზი დარჩა რაკეტების არგადაცემისთვის. ტრამპმა ზელენსკისთან შეხვედრამდე რამდენიმე დღით ადრეც განაცხადა, რომ აშშ-ს "ბევრი ტომაჰავკი აქვს" და მათი მიწოდება "სავსებით შესაძლებელია". შესაბამისად, აშშ-სა და ევროპის ოფიციალური პირებისთვის მოულოდნელი იყო, როცა ტრამპმა რამდენიმე დღეში პოზიცია შეცვალა და ზელენსკისთან შეხვედრისას საჯაროდ განაცხადა, რომ ეს რაკეტები "აშშ-ს სჭირდება". დახურულ შეხვედრაზე კი უკრაინის პრეზიდენტს განუცხადა, რომ მათი გადაცემა "ჯერ არ იგეგმება".

CNN-ის ცნობით, ტრამპის ამ გადაწყვეტილებას ერთი დღით ადრე წინ უძღოდა სატელეფონო საუბარი რუსეთის პრეზიდენტ ვლადიმირ პუტინთან, რომელმაც ტრამპს უთხრა, რომ "ტომაჰავკებს" შეეძლოთ ისეთ ქალაქებამდე მიღწევა, როგორიცაა მოსკოვი და სანქტ-პეტერბურგი — რაც ფრონტზე მნიშვნელოვან ცვლილებას ვერ გამოიწვევდა, მაგრამ დააზიანებდა აშშ-რუსეთის ურთიერთობებს.

ევროპელი ოფიციალური პირების თქმით, უკრაინელი ინჟინრები თავადაც შეძლებენ ალტერნატიული გადაწყვეტის პოვნას, თუკი აშშ მათ გამშვებ დანადგარებს არ გადასცემს. ერთ-ერთმა მათგანმა აღნიშნა, რომ უკრაინამ უკვე მოახერხა ბრიტანული Storm Shadow-ის რაკეტების ადაპტაცია საბჭოთა დროინდელი თვითმფრინავებისთვის მიუხედავად იმისა, რომ ეს რაკეტები თავდაპირველად მხოლოდ თანამედროვე NATO-ს ავიაციისთვის იყო შექმნილი.

ზელენსკიმ ამ კვირის დასაწყისში X-ზე დაწერა, რომ უკრაინა წლის ბოლომდე გეგმავს შორი მანძილის იარაღის შესაძლებლობების გაზრდას, რათა ომი "სამართლიან პირობებში" დასრულდეს.

"გლობალური სანქციები და ჩვენი ზუსტი დარტყმები სინქრონულად მუშაობს, რათა ომი სამართლიანად დასრულდეს უკრაინისთვის. ყველა შორ მანძილზე დარტყმის მიზანი უნდა იყოს სრულად მიღწეული წლის ბოლომდე," — წერს ზელენსკი.