პოლონელი ევროპარლამენტარი კშიშტოფ ბრეიზა ოცნების პარლამენტის ევროპასთან ინტეგრაციის კომიტეტის თავმჯდომარის, ლევან მახაშვილის წერილს ეხმაურება, რომელშიც ის განმარტავს, რატომ თქვა უარი ოცნების პარლამენტის დელეგაციამ ერევანში, EURONEST-ის საპარლამენტო ასამბლეის მე-12 პლენარულ სესიაში მონაწილეობაზე.

"ქართული ოცნების დელეგაცია ერევანში EURONEST-ზე არ გამოცხადდა. გასაკვირი არ არის — როდესაც თქვენი 2024 წლის "არჩევნები" გაყალბებულია და თქვენი ლეგიტიმურობა მთელ ევროპაში კითხვის ნიშნის ქვეშაა, ცარიელი სკამები უფრო იოლი გამოსავალია.

ისინი ჩვენ "მტრულს" გვეძახიან იმის გამო, რომ ქართველი ხალხის გვერდით ვდგავართ. სინამდვილეში, სწორედ მათივე მტრობაა დემოკრატიისა და ევროპის მიმართ, რაც მათ იზოლაციაში აყენებს.

მე ერევანში ვარ, რათა წარმოვადგინო ის ღირებულებები, რომლებსაც საქართველოს მოქალაქეები დღემდე სწამთ — თავისუფლება, სიმართლე და ევროპული მომავალი", — წერს კშიშტოფ ბრეიზა X-ზე.

აღმოსავლეთ პარტნიორობის საპარლამენტო ასამბლეის (EURONEST) მე-12 პლენარული სესია, ასევე ბიუროსა და კომიტეტის სხდომები, 28-დან 30 ოქტომბრამდე ერევანში გაიმართება.

ეროვნული ასამბლეის პრესსამსახურის ცნობით, EURONEST-ის საპარლამენტო ასამბლეის პოლიტიკის, ადამიანის უფლებებისა და დემოკრატიის, ეკონომიკური ინტეგრაციის, საკანონმდებლო დაახლოებისა და ევროკავშირის პოლიტიკასთან შესაბამისობის კომიტეტები 28 ოქტომბერს შეიკრიბებიან. იმავე დღეს ასევე შეიკრიბებიან სოციალურ საკითხთა, დასაქმების, განათლების, კულტურის, სამოქალაქო საზოგადოებისა და ენერგეტიკული უსაფრთხოების კომიტეტები. EURONEST-ის საპარლამენტო ასამბლეის მე-12 პლენარული სხდომის გახსნა 29 ოქტომბერს ეროვნული ასამბლეის სხდომათა დარბაზში გაიმართება.