დღეს, 20 ოქტომბერს, ლუქსემბურგში, ევროკავშირის საგარეო საქმეთა საბჭო შეიკრიბება, სადაც სხვა საკითხებთან ერთად საქართველოს საკითხსაც განიხილავენ.

"უმაღლესი წარმომადგენელი საქართველოში არსებულ ვითარებას განიხილავს და მინისტრებს უახლესი მოვლენების შესახებ მიაწვდის ინფორმაციას, მათ შორის 2025 წლის 4 ოქტომბერს ჩატარებული მუნიციპალური არჩევნებისა და დემოკრატიის მიმდინარე უკუქცევის შესახებ", — ნათქვამია ევროკავშირის ვებგვერდზე გავრცელებულ განცხადებაში.

შეხვედრა თბილისის დროით 11:15 წუთზე დაიწყება და მას ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, კაია კალასი უხელმძღვანელებს.

ევროკავშირის მიერ გავრცელებულ ინფორმაციაში ასევე ნათქვამია, რომ უკრაინის საგარეო საქმეთა მინისტრთან, ანდრეი სიბიჰასთან საუბრის შემდეგ, საბჭო უკრაინის წინააღმდეგ რუსეთის აგრესიასთან დაკავშირებულ უახლეს მოვლენებს განიხილავს.