ოცნების ხელისუფლების საგარეო საქმეთა სამინისტრომ ეუთოს სამდივნოს და მონაწილე ქვეყნებს საპროტესტო ნოტით მიმართა. საპროტესტო ნოტაში ვკითხულობთ, რომ ოცნების ხელისუფლება შეშფოთებას გამოხატავს ეუთოს მოქმედი თავმჯდომარისა და ფინეთის საგარეო საქმეთა მინისტრის, ელინა ვალტონენის მიერ პროგრამის ფარგლებს მიღმა ქმედებებზე. უწყების შეფასებით, ვალტონენის "საჯარო განცხადება არ ასახავს რეალობას და წარმოადგენს შეგნებულ მცდელობას, შეცდომაში შეიყვანოს საერთაშორისო საზოგადოება საქართველოში არსებული მდგომარეობის შესახებ".

საგარეო უწყების განმარტებით, ვალტონენის ქმედებები "შეუთავსებელია საერთაშორისო სამართლის საყოველთაოდ აღიარებულ პრინციპებთან".

"საქართველოს საელჩო ავსტრიის რესპუბლიკაში და მუდმივი წარმომადგენლობა ეუთო-სა და ქ. ვენაში სხვა საერთაშორისო ორგანიზაციებში გამოხატავს თავის ღრმა პატივისცემას ეუთო-ს სამდივნოს მიმართ და აქვს პატივი, გამოხატოს საქართველოს მთავრობის შეშფოთება ფინეთის რესპუბლიკის საგარეო საქმეთა მინისტრის ელინა ვალტონენის, როგორც ეუთო-ს მოქმედი თავმჯდომარის საქართველოში ვიზიტთან დაკავშირებით.

ეუთო-ს მოქმედი თავმჯდომარის განხორციელებული პროგრამის ფარგლებს მიღმა, რომელიც მოიცავდა შეხვედრას საქართველოს საგარეო საქმეთა მინისტრ მაკა ბოჭორიშვილთან, საოკუპაციო ხაზზე ვიზიტს და შეხვედრას სამოქალაქო საზოგადოების რამდენიმე წარმომადგენელთან, მინისტრი ელინა ვალტონენი შეუერთდა ანტისამთავრობო აქტივისტთა მცირე ჯგუფის მიერ ორგანიზებულ ქუჩის აქციას, რომლებმაც 14 ოქტომბერს თავისუფლად, თუმცა არალეგალურად, გადაკეტეს თბილისის მთავარი გამზირი. მინისტრი ვალტონენის მიერ გაკეთებული საჯარო განცხადება, რომელიც არ ასახავს რეალობას, წარმოადგენს შეგნებულ მცდელობას, შეცდომაში შეიყვანოს საერთაშორისო საზოგადოება საქართველოში არსებული მდგომარეობის შესახებ.

ეს ქმედებები ეწინააღმდეგება ეუთო-ს ფარგლებში თანამშრომლობის სულისკვეთებას და შეიძლება, ჩაითვალოს თავმჯდომარის მანდატის ბოროტად გამოყენებად, რაც აზიანებს ნდობასა და მოსალოდნელ ნეიტრალიტეტს.

აღნიშნული ქმედებები შეუთავსებელია საერთაშორისო სამართლის საყოველთაოდ აღიარებულ პრინციპებთან, რომელთა შორისაა — სუვერენიტეტის პატივისცემა და შიდა საქმეებში ჩაურევლობა, როგორც ეს ასახულია ჰელსინკის დასკვნით აქტში, გაეროს A/RES/20/213 რეზოლუციაში, ეუთო-ს წესებსა და პროცედურებში და ეწინააღმდეგება დიპლომატიური ურთიერთობების შესახებ ვენის კონვენციის სულისკვეთებას," — ვკითხულობთ საგარეო უწყების ნოტაში.

შეგახსენებთ, ეუთოს თავმჯდომარე ელინა ვალტონენი 14 ოქტომბერს საქართველოს ეწვია, მანამდე ის სომხეთი იმყოფებოდა, 15 ოქტომბერს კი აზერბაიჯანში გაემგზავრა. ვალტონენი, საქართველოში ვიზიტის ფარგლებში, ოცნების ხელისუფლების საგარეო საქმეთა მინისტრს შეხვდა, დღის ბოლოს კი რუსთაველის გამზირზე მიმდინარე აქციაზე მივიდა და პროტესტის მონაწილეებს მხარდაჭერა გამოუცხადა.

15 ოქტომბრის დილას ოცნების ხელისუფლების მთავრობის ადმინისტრაციამ გაავრცელა ინფორმაცია, რომ ამ ნაბიჯის გამო ირაკლი კობახიძემ მასთან შეხვედრა გააუქმა. ფინურ გამოცემასთან საუბრისას კი ვალტონენიმ განაცხადა, რომ აზერბაიჯანში გამგზავრების გამო თავდაპირველად მან გააუქმა ირაკლი კობახიძესთან შეხვედრა.

დღეს, ტელეკომპანია იმედმა გაავრცელა ინფორმაცია, რომ "ეუთოს მოქმედი თავმჯდომარე ფინეთის საგარეო საქმეთა მინისტრი, ელინა ვალტონენი რუსთაველის გამზირზე გზის უკანონო გადაკეტვისთვის დაჯარიმდა". მოგვიანებით ინფორმაცია NEWS.On.ge-ს შსს-ში დაუდასტურეს.

ცოტახნის წინ, ეუთოს თავმჯდომარე და ფინეთის საგარეო საქმეთა მინისტრი ელინა ვალტონენი საქართველოში ვიზიტის შემდეგ X-ზე პირველი კომენტარი გააკეთა, სადაც ვალტონენი ბოდიშს უხდიდა კობახიძეს შეხვედრის გაუქმებისთვის და ფინეთში მოიწვია "მისთვის სასურველი ნებისმიერ დემონსტრაციის დასაკვირვებლად".