"ქალბატონო ელინა, თქვენ შეურაცხყოფა მიაყენეთ ქართულ საზოგადოებას, ქართულ სახელმწიფოს, ამიტომ ახლა ელაპარაკეთ რადიკალებს, უსამშობლოებს და ამით დაასრულეთ თქვენი ვიზიტი — შერცხვენილი ხართ და ჩვენ თქვენთან არ გვსურს უკვე არანაირი ურთიერთობა," — ასე უპასუხა ეუთოს თავმჯდომარეს ოცნების დეპუტატმა, ირაკლი ზარქუამ.

ზარქუამ ეუთოს თავმჯდომარეს მოუწოდა, რომ "აცდენილია მანდატებს" და დასძინა, რომ ის ცრუობს, რადგან რუსთაველის გამზირზე მომიტინგეებს "მშვიდობიანი" უწოდა.

"ის, რაც ეუთოს მოქმედმა ხელმძღვანელმა და ამავდროულად, ფინეთის საგარეო საქმეთა მინისტრმა იკადრა, არაფერში წერია. ეს არის ქართული სახელმწიფოს, ქართული საზოგადოების კიდევ ერთხელ შეურაცხყოფა. ეს არის შეურაცხყოფა, მათ შორის, დიპლომატიური მანდატის. რა გააკეთა?! რადიკალებთან ერთად დადგა რუსთაველზე, სადღაც 20-30 კაცი იყო. ბუნებრივია, რეაგირება იქნებოდა სწორი და ადეკვატური ჩვენი ხელისუფლებისგან. ის შეხვედრა, რომელიც იყო დაგეგმილი, ბუნებრივია, ჩაიშლებოდა და ჩაიშალა კიდეც. კიდევ ერთხელ მინდა მოვუწოდო ქალბატონ ელინას, ძალიან აცდენილი არიან ისინი თავიანთ მანდატებს, როგორც ნაწილი ელჩებისა, ასევე თვითონ. ძალიან ცუდად ჩანს, როდესაც მიდიხარ რუსთაველის "პროსპექტზე" რადიკალებთან, თან ცრუობ და ამბობ მშვიდობიანი მომიტინგეები არიანო.

რამდენიმე დღის წინ, პრეზიდენტის რეზიდენციაში შევარდნენ, ქალბატონო ელინა. თქვენს ქვეყანაში, ფინეთში რადიკალებს ამის მეათედი რომ გაებედათ და მერე ჩასულიყო საქართველოს საგარეო საქმეთა მინისტრი და იმ რადიკალებთან დამდგარიყო, მოგეწონებოდათ?! ეს ჩაიდინეთ თქვენ. შეურაცხყოფა მიაყენეთ ქართულ საზოგადოებას, ქართულ სახელმწიფოს, ამიტომ ახლა ელაპარაკეთ რადიკალებს, უსამშობლოებს და ამით დაასრულეთ თქვენი ვიზიტი. თავი შეირცხვინეთ, დაარღვიეთ ის მანდატი, რითაც აქ ჩამოხვედით. როდესაც ჩამოდიხართ აქ ეუთოს თავმჯდომარის მანდატით და ამავდროულად, ხართ ფინეთის საგარეო საქმეთა მინისტრი, მეტი პასუხისმგებლობა და დაკვირვება გმართებთ. შერცხვენილი ხართ და თქვენთან დაკავშირებით ჩვენ არ გვსურს უკვე არანაირი ურთიერთობა," — თქვა ზარქუამ.

შეგახსენებთ, 14 ოქტომბერს საქართველოში ვიზიტით მყოფი ეუთოს თავმჯდომარე და ფინეთის საგარეო საქმეთა მინისტრი ელინა ვალტონენი, დელეგაციის წევრებთან ერთად, პარლამენტთან შეკრებილ დემონსტრანტებს შეხვდა და მხარდაჭერა გამოუცხადა. დღეს კი საოკუპაციო ხაზთან ჩავიდა.

ოცნების ხელისუფლების მთავრობის ადმინისტრაციის ცნობით, ირაკლი კობახიძემ ეუთოს თავმჯდომარე ელინა ვალტონენისთვან დაგეგმილი შეხვედრა გააუქმა.