ბრიტანელი პარლამენტარი, ჯეიმს მაკკლირი სოციალურ ქსელში წერს, რომ დიდი ბრიტანეთის პარლამენტში სიტყვით გამოსვლისას საქართველოს შესახებ ისაუბრა. მისი თქმით, ელენე ხოშტარია და გიორგი ვაშაძე "ქართული ოცნების რეჟიმის მიერ დემოკრატიაზე სასტიკი თავდასხმის უახლესი მსხვერპლები არიან და ისინი დაუყოვნებლივ უნდა გათავისუფლდნენ".

მისივე თქმით, "დიდმა ბრიტანეთმა უნდა იმოქმედოს და სანქციები დააწესოს ივანიშვილისა და მისი მეგობრებს".

დიდი ბრიტანეთის პარლამენტში სიტყვის გამოსვლისას მაკკლირიმ თქვა, რომ "ავტორიტარიზმი ვრცელდება, როდესაც დემოკრატია ხდება მხდალი", ამიტომ ისინი "მხდალები არ იქნებიან და მხარში დაუდგებიან საქართველოს".

"ჩვენთვის, როგორც ბრიტანელი პარლამენტარებისთვის მნიშვნელოვანია, წინ აღვუდგეთ მათ, ვინც ძირს უთხრის და ანგრევს ბრძოლით მოპოვებულ დემოკრატიულ თავისუფლებებს აქ და საზღვარგარეთ. მაგალითად, საქართველოში, გასულ ნოემბერს საქართველოს მთავრობამ შეაჩერა EU-ში გაწევრიანების შესახებ მოლაპარაკებები, არჩევანი, რამაც საზოგადოებაში დიდი აღშფოთება გამოიწვია, რადგანაც გამოკითხვები მუდმივად აჩვენებენ ევროპაში ინტეგრაციის მიმართ მტკიცე მხარდაჭერას. მას შემდეგ პროტესტის მონაწილეებმა გაავსეს რუსთაველის ქუჩა თითქმის ყოველდღიურად. ისინი ებრძოდნენ მამაცურად ხელკეტებსა და წყლის ჭავლებს, რათა თქვან, რომ "ჩვენი მომავალი ჩვენია".

ზაფხულის განმავლობაში ქართული ოცნების მთავრობამ დაიწყო ოპოზიციის ლიდერების დაკავება. კვირების წინ შემატყობინეს, რომ ჩემი მეგობარი და ოპოზიციის ერთ-ერთი ლიდერი, გიორგი ვაშაძე დააკავეს და მხოლოდ გუშინ, მორიგი ოპოზიციონერი პოლიტიკოსი ელენე ხოშტარიაც დააკავეს. საშინელი დანაშაული, რომელსაც მას აბრალებენ? — თბილისის მერის საარჩევნო ბანერების დაზიანება.

როგორ გავცემთ პასუხს დემოკრატიის ამ გამოწვევებს განსაზღრავს როგორც ჩვენ, ასევე იმ ქვეყნებს, სადაც ეს უფლებები ირღვევა. დემოკრატია მხოლოდ საარჩევნო ყუთი არაა, დემოკრატია ეს არის მოქალაქე თბილისში, რომელიც პროტესტს გამოთქვამს შიშის გარეშე, ჟურნალისტი ბელგრადში რომელიც ააშკარავებს კორუფციას, ღამით მის კართან კაკუნის გარეშე, სტუდენტი ჰონგ-კონგში, რომელიც პეკინის მიერ გაჩუმებაზე ამბობს უარს, უკრაინის მოქალაქე, რომელიც აძლევს ხმას მომავალს რუსული ცეცხლის ქვეშ.

ავტორიტარიზმი ფესვს იდგამს, როდესაც დემოკრატია მხდალი ხდება. ჩვენ, ლიბერალ-დემოკრატები, მხდალები არ ვიქნებით. ჩვენ მხარში დავუდგებით საქართველოს, ბოსნია და ჰერცეგოვინას და სერბეთის ხალხს, ჰონგ-კონგიდან გადმოსახლებულებს, უკრაინის გმირ მცველებს, და ყოველ ადამიანს, რომელიც თავისი ხმის გასაგონად იბრძვის“

ბრიტანეთი ცნობილი უნდა იყოს როგორც ქვეყანა, რომელიც არა მხოლოდ ლექციებს ატარებს დემოკრატიის შესახებ, არამედ ცხოვრობს მისით, იცავს მას, ინვესტიციას დებს მასში", — განაცხადა ბრიტანელმა პარლამენტარმა ("ფორმულას" თარგმანი).