"ისინი ან "ყვარყვარეს ციხეს" ააშენებენ და ყველას გამოგვკეტავენ, ან ყველაფერს გავაკეთებთ იმისთვის, რომ ისინი გავუშვათ დამსახურებულ ადგილას, სადაც ეკუთვნით," — ასე ეხმაურება ოპოზიციონერი პოლიტიკოსი თეონა აქუბარდია კოალიცია ცვლილებებისთვის ერთ-ერთი ლიდერის ელენე ხოშტარიას დაკავებას.

მისი თქმით, ოპოზიციის ერთ-ერთ ლიდერის დაკავება ნიშნავს, რომ ოცნებას "ძალაუფლების სიმყარე" არ აქვს.

თეონა აქუბარდიას განცხადებით, კახა კალაძემაც ძალიან კარგად იცის, რომ ელენე ხოშტარიამ ბანერზე სიმართლე დაწერა.

"რეჟიმს ეშინია იმ მყიფე ძალაუფლების დაკარგვის, რომელიც მას აქვს. პატარა არაკაცები გამოდიან და ქალების შეურაცხყოფას არა მხოლოდ ამართლებენ, არამედ კაცის სახე აქვთ დაკარგული. როდესაც ერთ დღეს ამბობენ, რომ ისინი პატრიოტები არიან და ღირსებას იცავენ, ეს კიდევ ერთი სახეა, მათ შორის მათი უღირსობის. ფლომასტერით მინაწერი, სიმართლე კახა კალაძემაც ძალიან კარგად იცის, იყო ის საბაბი, რის გამოც ახლა უკვე ელენე დააკავეს და წინა დღეებში ნაციონალური მოძრაობის ერთ-ერთი ლიდერი, ლევან ხაბეიშვილი. ამიტომ, ისინი ან "ყვარყვარეს ციხეს" ააშენებენ და ყველას გამოგვკეტავენ, ან ყველაფერს გავაკეთებთ იმისთვის, რომ ისინი გავუშვათ დამსახურებულ ადგილას, სადაც ეკუთვნით. ეს უნდა იყოს მშვიდობიანი პროტესტით, იმ წინააღმდეგობით, რომელიც 300 დღეზე მეტია გრძელდება. ეს კიდევ ერთხელ არის იმის ნიშანი, რომ მათ არ აქვთ ძალაუფლების სიმყარე," — განაცხადა აქუბარდიამ. [IPN]

მისივე თქმით, ოცნებაში "გაგდებულებსა და არსებულ გუნდს" შორის "კლანური ბრძოლაა", რასაც მათივე თავდაცვის ყოფილი მინისტრის დაკავება ადასტურებს.

თეონა აქუბარდიას განცხადებით, ბიძინა ივანიშვილი "კორუფციულ რეჟიმზე" დგას და მას ძალაუფლების შენარჩუნება ავტორიტარული მეთოდებით სურს.

"ლიბერალიზმთან მებრძოლი, 8 შვილის მამის, ჯუანშერ ბურჭულაძის დაკავება სულაც არ უკავშირდება კორუფციას, ეს არის კლანური ბრძოლა, შიში გაგდებულებსა და არსებულ გუნდს შორის, კობახიძის თამადობით. კობახიძემ მოუგო ირაკლი ღარიბაშვილს ის პარტია, რომელიც მისი სრული ძალაუფლების კონცენტრაციით დასრულდა და ახლა შიში აქვს, ეს ძალაუფლება არ შეირყეს. არაერთს აქვს ნანახი, როგორ მოისვრის ხოლმე ივანიშვილი თავის სანდო ჯარისკაცებს, როცა მას ისინი აღარ სჭირდება. თავად ივანიშვილი დგას კორუფციულ რეჟიმზე. ეს არის ის, რითაც მას ძალაუფლების შენარჩუნება ავტორიტარული მეთოდებით სურს. მხარდაჭერა ყველა პოლიტიკურ, სინდისის პატიმარს. ბრძოლა ბოლომდე," — განაცხადა აქუბარდიამ ეთერში.

კოალიცია ცვლილებისთვის ლიდერის, ელენე ხოშტარიას დაკავება შინაგან საქმეთა სამინისტრომ ოფიციალური განცხადებით დაადასტურა. უწყებამ გამოძიება "ნივთის დაზიანების" მუხლით დაიწყო. ოპოზიციონერმა 14 სექტემბერს კალაძის ბანერებზე დააწერა: "რუსული ოცნება", "რუსი". ელენე ხოშტარიას თქმით, ამით მან სოლიდარობა გამოხატა მეგი დიასამიძის მიმართ, რომელიც ამავე ბანერებზე გაკეთებული წარწერის გამო დააკავეს და შემდეგ გირაოთი გაათავისუფლეს.

რაც შეეხება ჯუანშერ ბურჭულაძეს, ის ოცნების თავდაცვის ყოფილი მინისტრია და 11 სექტემბერს სამსახურებრივი უფლებამოსილების გადამეტებისა და ფულის გათეთრების ბრალდებით დააკავეს. მას 9-დან 12 წლამდე პატიმრობა ემუქრება.