ძალიან გამიკვირდება, ვერც ვუშვებ იმას, რომ რაიმე კორუფციულ სისტემაში იყოს ჩართული [ირაკლი ღარიბაშვილი], — ამის შესახებ "ოცნების" პარლამენტის ვიცესპიკერმა, გიორგი ვოლსკიმ ჟურნალისტის კითხვაზე — ჯუანშერ ბურჭულაძის დაკავების შემდეგ უნდა ველოდოთ თუ არა ირაკლი ღარიბაშვილის დაკავებას? — განაცხადა.

ამის მიუხედავად გია ვოლსკიმ ისიც დაუშვა, რომ ასეთი რამ შეიძლება მოხდეს:

"გამოძიება აჩვენებს ყველაფერს. არ უნდა დავუშვათ, რომ ვინმეს ეჭვი დარჩეს რაღაცა დანაშაულის დაფარვის მცდელობაზე.

ძალიან გამიკვირდება, ვერც ვუშვებ იმას, რომ რაიმე კორუფციულ სისტემაში იყოს ჩართული [ირაკლი ღარიბაშვილი]. საერთოდ, არის ეგეთი ფორმულა, რომ არაფერი უნდა გამორიცხო ამ ცხოვრებაში, მაგრამ ადამიანები ვართ ჩვენის სისუსტეები გვაქვს და შეიძლება გამორიცხო კიდევაც. ვნახოთ, ყოველ შემთხვევაში, ვინც არ უნდა იყოს, ნებისმიერი ადამიანი, რომელიც სახელმწიფოს დაუპირისპირდება ასეთი ბოროტო დანაშაულით, როგორიცაა კორუფცია, ყველას პასუხო მოეთხოვება", — განაცხადა "ოცნების" პარლამენტის ვიცესპიკერმა, გიორგი ვოლსკიმ.

შეგახსენებთ, რომ ოცნების ხელისუფლების თავდაცვის ყოფილი მინისტრი ჯუანშერ ბურჭულაძის დაკავების შესახებ ინფორმაცია სუს-მა გუშინ გაავრცელა. ბურჭულაძის ადვოკატის ცნობით, მისი დაცვის ქვეშ მყოფმა საყოფაცხოვრებო პირობებში დაზიანება მიიღო და ტვინის შერყევა აქვს და სწორედ ეს გახდა მისი კლინიკაში გადაყვანის მიზეზი. თავდაცვის ყოფილი მინისტრისთვის ბრალი ოფიციალურად ჯერ არ წარუდგენიათ. ამ დრომდე ის კლინიკა "ჰელსიკორეშია".

ჯუანშერ ბურჭულაძე სამსახურებრივი უფლებამოსილების გადამეტებისა და ფულის გათეთრების ბრალდებით დააკავეს. მას 9-დან 12 წლამდე პატიმრობა ემუქრება.

ჯუ­ან­შერ ბურ­ჭუ­ლა­ძე თავ­დაც­ვის მი­ნის­ტრის პოსტზე, ირაკლი ღარიბაშვილის წარდგენით, 2021 წლი­დან მუ­შა­ობ­და. მა­ნამ­დე ის ღა­რი­ბაშ­ვი­ლის (თავდაცვის მინისტრის პოსტზე ყოფნის პერიოდში) მო­ად­გი­ლე იყო.

ჯუანშერ ბურჭულაძის დაკავებამდე, გუშინ, 11 სექტემბერს ენმ-ს წევრი ლევან ხაბეიშვილი და კოალიცია ცვლილებისთვის წევრი მურთაზ ზოდელავა დააკავეს.