პროკურატურა ეხმაურება "ტვ პირველის" გავრცელებულ ინფორმაციას, სადაც უწყების წარმომადგენელი აცხადებს, რომ ლევან ხაბეიშვილის ტელეფონის დათვალიერება ვერ მოხერხდა. პროკურატურის განცხადებაში ვკითხულობთ, რომ უწყებას ექსპერტიზა არც დაუნიშნავს ბრალდებულის ტელეფონის დათვალიერებაზე, შესაბამისად მისი გახსნა არც უცდიათ.

"საზოგადოების ინფორმირების მიზნით, გვსურს გამოვეხმაუროთ მედიასა და სოციალურ ქსელებში გავრცელებულ ცრუ ინფორმაციას იმის შესახებ, თითქოს პროკურორმა მედიასთან კომენტარის დროს განაცხადა, რომ ლევან ხაბეიშვილის მობილური ტელეფონის გახსნა ვერ მოხერხდა. ხაზგასმით გვინდა აღვნიშნოთ, რომ პროკურორმა მედიისთვის მიცემულ კომენტარში განმარტა, რომ ლევან ხაბეიშვილის მობილური ტელეფონის დათვალიერება ჯერ არ მომხდარა, რადგან ექსპერტიზაც კი არ არის ამ ეტაპზე დანიშნული," — ვკითხულობთ უწყების განცხადებაში.

პროკურატურა განცხადებაში განმარტავს, რომ "ზოგადად iPhone-iს მოდელის ტელეფონები რიგ შემთხვევაში შესაძლოა გაიხსნას, შესაძლოა ვერ გაიხსნას".

შეგახსენებთ, მოსამართლე ფიქრია სიქტურაშვილმა ერთიანი ნაციონალური მოძრაობის ერთ-ერთ ლიდერს, ლევან ხაბეიშვილს წინასწარი პატიმრობა შეუფარდა. პროკურატურის განცხადებით, ლევან ხაბეიშვილს ბრალდება საქართველოს სსკ-ის 339-ე მუხლის მეორე ნაწილით და 317-ე მუხლით წარედგინა. 339-ე მუხლის მეორე ნაწილი უკანონო ქმედების ჩასადენად მოხელისათვის ქრთამის (ფულის გადაცემის) დაპირებას გულისხმობს, 317-ე მუხლი — საქვეყნოდ მოწოდებას სახელმწიფო ხელისუფლების დამხობისაკენ.