"4 საათი ვისხედით მე და ადვოკატი გამოკითხვაზე და თითოეულ დეტალს გავდიოდით," — ასე პასუხობს კახა კალაძის შტაბთან გამართული აქციების მონაწილე ქეთი ალავერდაშვილი შინაგან საქმეთა სამინისტროს განცხადებას იმის შესახებ, რომ დაზარალებულებმა გამოძიებასთან არ ითანამშრომლეს და "შეუძლებელი გახდა ჯგუფური ძალადობის ბრალდებით დაკავებული ორი პირის [მათ შორის ზაზა მამალაძის] პასუხისგებაში მიცემა"

• კალაძის შტაბთან დაკავებული ოცნების აქტივისტები გაათავისუფლეს, მეგი დიასამიძის საქმეზე პროკურატურა სასამართლოს გირაოს შეფარდებისთვის მიმართავს

ქეთი ალავერდაშვილის განცხადებით, არსებობს კადრები, რომლებშიც ჩანს, რომ ზაზა მამალაძე აქტიურად არის ჩართული ძალადობრივ ქმედებებში.

"ეს ადამიანი დაკავებული იყო არა ჩემზე ძალადობის ბრალდებით, არამედ ჯგუფურად ძალადობის ბრალდებით და ჩემი კადრის გარდა არსებობს ძალიან ბევრი კადრი, სადაც ის ძალადობრივ ქმედებებში ძალიან აქტიურად არის ჩართული. მე არ მითქვამს ტყუილი, არ მითქვამს ის, რომ განვიცადე ფიზიკური ტკივილი ამ დარტყმის შედეგად და რადგან ფიზიკური ტკივილი არ განვიცადე ისინი აღარ აპირებენ სისხლის სამართლის საქმე აღძრან ამ კონკრეტულ "ქეისში", გასაგებია, მაგრამ სხვა "ქეისებს" რას ეშვებით, სადაც ეს კაცი აქტიურობს მე არ მესმის. მარტო ჩემს ტკივილზე ხომ არ არის აქ, მე ამ პოსტით უბრალოდ იმასაც გავუსვი ხაზი, რომ მე არ მომიტყუებია და პარალელურად ვამხილე ის ირაკლი დგებუაძეც, იმას საერთოდ არ სტკენია მეთქი.

გუშინ 4 საათი ვისხედით მე და ადვოკატი გამოკითხვაზე და თითოეულ დეტალს გავდიოდით, ისეთი დეტალებიც კი განიხილეს ვიდეოში, მაგალითად დარტყმის შედეგად თავი, რომ გავწიე, დარტყმის ძალის გამო გავწიე თუ აცილებას ვაპირებდი იმ დარტყმულის, რაღაცამ თავის ზემოთ გაიფრიალა ამ დარტყმის შედეგად და ნივთი ხომ არ დაკარგეთო, თითოეულ დეტალს ეკირკიტებოდნენ და ჩვენც ვცემდით პასუხებს, დიდი ხანი მიდიოდა ეს გამოკითხვა, ტექსტის შედგენის პროცესი, გარემოს აღწერის პროცესი, ამ კაცის აღწერის, სიტუაციის აღწერის, ყველაფრის აღწერის და იდეალურად ვითანამშრომლეთ, რა ვიცი, ყავაც კი დაგვალევინეს," — განაცხადა ქეთი ალავერდაშვილმა "ფორმულასთან".

მანამდე მან სოციალურ ქსელშიც დაწერა, რომ შსს-მ ძალადობის ამსახველი სხვა კადრები რეაგირების გარეშე დატოვა.

"წერენ, რომ არ ვითანამშრომლეთ, რაც აბსურდია. გუშინ 4 საათი ვიყავით მე და ადვოკატი გამოკითხვაზე და თითოეული დეტალი გავიარეთ. ვუთხარი, რომ ზაზა მამალაძეზე (თუ მანგოშვილზე) ყველა მასალა მქონდა შეკრებილი და სახლში მოვალთ და წავიღებთო. არადა იქვე მქონდა მიტანილი თან, ეს ზაზა თუ ვინცაა, დაკავებული იყო ჯგუფური ძალადობის ბრალდებით და არა სილის გარტყმის ეპიზოდის გამო. თუმცა რადგანაც მე ტკივილი არ განმიცდია, უშვებენ ახლა და ძალადობის სხვა კადრებიც იგნორდება," — დაწერა ქეთი ალავერდაშვილმა.

8-9 სექტემბერს, მელიქიშვილის ქუჩაზე, კახა კალაძის საარჩევნო შტაბთან მომხდარი ძალადობის დროს დაკავებული ოცნების მხარდამჭერები ზაზა მამალაძე ირაკლი ბუაჩიძე გაათავისუფლეს, ხოლო კახა კალაძის ბანერზე გაკეთებული წარწერისთვის დაკავებული 23 წლის აქტივისტის, მეგი დიასამიძის საქმეზე პროკურატურა სასამართლოს გირაოს შეფარდების შესახებ მიმართავს.

ასევე იხილეთ:

• SJC-ის შეფასებით, მეგი დიასამიძის წინააღმდეგ სისხლისსამართლებრივი დევნა მოქალაქეთა პოლიტიკური აქტივიზმის შეზღუდვას ემსახურება
• "არ არის საჭირო მივარდნები" — კახა კალაძე მეგი დიასამიძის დაკავებაზე
• ნონა ქურდოვანიძე: "მეგი დიასამიძის წინააღმდეგ მაქსიმუმ სამოქალაქო წესით სარჩელის შეტანა შეიძლებოდა"
• საბა ბრაჭველი: 23 წლის მეგი დიასამიძეს არარსებული დანაშაულის გამო ჯერ ორთვიანი, ჯამში კი ხუთწლიანი პატიმრობა ემუქრება
• ნინო ლომჯარიას თქმით, კალაძის ბანერი სააგიტაციო მასალაა და მისი დაზიანება საარჩევნო კოდექსით უნდა ისჯებოდეს, რაზეც 1000-ლარიანი ჯარიმაა
• მიდიოდა საკუთარ სახლში, აჭარაში, სადღაც ლანჩხუთის მიმდებარე ტერიტორიაზე ჩაუსაფრდნენ — შოთა თუთბერიძე მეგი დიასამიძის დაკავებაზე