აშშ-ის პრეზიდენტმა, დონალდ ტრამპმა უარყო ჩინეთის პრეზიდენტ სი ძინპინთან ამერიკული შეიარაღების მიყიდვაზე საუბარი, თუმცა დასძინა, რომ ჩინეთს შეიარაღების ყიდვა "სავარაუდოდ, მოუნდებოდა". ინფორმაციას The Hill ავრცელებს.

ტრამპმა სი ძინპინთან მისი ბოლო შეხვედრის შესახებ ჟურნალისტების კითხვებს უპასუხა და გამოეხმაურა ჩინეთში აშშ-ის ელჩის, დევიდ პერდიუს კვირას გაკეთებულ განცხადებას იმის შესახებ, რომ თითქოს ტრამპმა ჩინეთს იარაღის მიყიდვა შესთავაზა.

"ამის შესახებ არ გამიგია... არც კი მჭირდება მისთვის კითხვა. იმის თქმა გსურთ, რომ ვყიდით? არა, ალბათ მათ ყიდვა მოუნდებოდათ, რადგან ჩვენ მართლაც უკეთეს აღჭურვილობას ვაწარმოებთ, ასე რომ, შესაძლოა, ეს კარგი იდეაა. მაგრამ ჩვენ ამაზე არ გვისაუბრია. შესაძლოა, ის ტაივანზე საუბრობდა. ვფიქრობ, ალბათ სწორედ ამას გულისხმობდა", — თქვა ტრამპმა.

ცნობისთვის, ჩინეთში აშშ-ის ელჩმა განაცხადა, რომ ტრამპმა ჰკითხა პრეზიდენტ სი ძინპინს, ისურვებდა თუ არა შეიარაღების ყიდვას.

"პრეზიდენტი ტრამპი მუდმივად ამბობს: "ჰეი, ჩვენ იარაღს ვყიდით სხვა ადამიანებისთვის მთელ მსოფლიოში". ერთ მომენტში მან რეალურად ჰკითხა პრეზიდენტ სი ძინპინს, ისურვებდა თუ არა რაიმეს ყიდვას", — განაცხადა დევიდ პერდიუმ კვირას Fox News-თან ინტერვიუში.

ელჩმა დეტალები არ დააკონკრეტა და არც ის გაამჟღავნა, თუ რა უპასუხა სი ძინპინმა.