საქართველოს ხელისუფლებამ ბელარუსი აქტივისტი ლევ მიხეევი, რომელიც ქვეყანაში პოლიტიკური თავშესაფრის მიღებას 2021 წლიდან უშედეგოდ ცდილობდა, სომხეთში გააძევა. მიხეევი საზღვარზე მცირე ხნით სომხეთის სამართალდამცავებმაც დააკავეს, თუმცა მოგვიანებით გაათავისუფლეს. ინფორმაციას OC Media ავრცელებს.

დამოუკიდებელ ბელარუსულ მედიასთან საუბარში მიხეევმა განაცხადა, რომ საქართველოში ხუთი წლის განმავლობაში ცხოვრობდა. მიგრაციის დეპარტამენტმა ის 25 სექტემბერს დააკავა.

როგორც აქტივისტი ყვება, დაკავებამდე ორი კვირით ადრე ის მარტყოფის მიმღებ ცენტრში დროებითი პირადობის მოწმობის გასაახლებლად მივიდა. განაცხადი მიიღეს და ორი კვირის შემდეგ დაბრუნება სთხოვეს, თუმცა ხელახლა მისვლისას დეპარტამენტის თანამშრომლებმა ტელეფონი ჩამოართვეს და თბილისში გადაიყვანეს.

მისივე თქმით, მიგრაციის დეპარტამენტში უთხრეს, რომ ქვეყანაში არალეგალურად იმყოფებოდა და მისი თქმით, ძალაში მყოფი საიდენტიფიკაციო დოკუმენტი "სრულიად უმნიშვნელო“ იყო.

მას ორი ალტერნატივა შესთავაზეს — ხელბორკილებით გაძევება ან ქვეყნის ნებაყოფლობით დატოვება. მიხეევმა ბელარუსში დაბრუნებაზე კატეგორიული უარი თქვა, რადგან ქვეყანა პოლიტიკური დევნის გამო დატოვა. მან ასევე მოითხოვა ვადის გახანგრძლივება 9 ოქტომბრამდე, სანამ პირადობის მოწმობის ვადა ამოეწურებოდა, თუმცა უარი მიიღო.

აქტივისტის თქმით, მას ქართულენოვან დოკუმენტებზე მოაწერინეს ხელი, რომელთა შინაარსიც არ ესმოდა.

მედიაში გავრცელებულ ინფორმაციას შინაგან საქმეთა სამინისტროს მიგრაციის დეპარტამენტი გამოეხმაურა. უწყებაში განაცხადეს, რომ გავრცელებული ცნობები "არასწორი და დამმახინჯებელი ფორმითაა" წარმოდგენილი.

დეპარტამენტის ცნობით, მიხეევის 2021 წლის თავშესაფრის მოთხოვნა, რომელიც პოლიტიკურ აქტივობას უკავშირდებოდა, 2024 წლის სექტემბერში არაკანონიერად ცნეს, ვინაიდან სტატუსის მინიჭების სამართლებრივი საფუძველი არ არსებობდა. მიუხედავად იმისა, რომ მან გადაწყვეტილება ორ სასამართლოში გაასაჩივრა, სასამართლოებმა უარი ძალაში დატოვეს. შედეგად, მან 2026 წლის ივნისიდან თავშესაფრის მაძიებლის სტატუსი დაკარგა და სამი თვის შემდეგ "სამართლებრივი საფუძვლის გარეშე" ყოფნის გამო დააკავეს.

უწყების მტკიცებით, ხელმოწერამდე დოკუმენტების შინაარსი აქტივისტს თარჯიმნის მეშვეობით განემარტა, ხოლო დანიშნულების ქვეყნად სომხეთი მან თავად აირჩია.

სომხეთის საზღვარზე გადასვლისას მიხეევი მცირე ხნით ბელარუსის მიერ დსთ-ის ფარგლებში გამოცემული სახელმწიფოთაშორისი ძებნის მოთხოვნის საფუძველზე დააკავეს (მას სამშობლოში ალექსანდრე ლუკაშენკოს შეურაცხყოფას ედავებიან). პოლიციის განყოფილებაში გატარებული ღამის შემდეგ ის 26 სექტემბერს გაათავისუფლეს.

ლევ მიხეევი მომავალში საქართველოს მიგრაციის სამსახურის ქმედებების სამართლებრივ შეფასებას გეგმავს. საქმეს ასევე აკვირდება ბელარუსის მთავრობა ეგზილში (გაერთიანებული გარდამავალი კაბინეტი), რომელიც მისთვის საქართველოში იურიდიული დახმარების უზრუნველყოფაზე მუშაობს.