რუსეთისა და ისრაელის ორმაგი მოქალაქეობის მქონე ცოლ-ქმარი, ალექსანდრ კრუგლიანსკი და ალექსანდრა კრუგლიანსკაია, მონტენეგროში დააკავეს. სასამართლოს გადაწყვეტილებით, ისინი 30 დღემდე პატიმრობაში დარჩებიან.

წყვილი ტივატის აეროპორტში დააკავეს, როდესაც 19 ჩემოდნით თელ-ავივში გაფრენას ცდილობდა. ამის შესახებ ცნობას The Insider ავრცელებს.

მოგვიანებით, პოლიციამ ბუდვაში, მათ მიერ გამოყენებულ ბინაში, დაახლოებით 1 მილიონი ევრო და დიდი რაოდენობით IT-აღჭურვილობა აღმოაჩინა. მონტენეგრული გამოცემა Vijesti-ს ინფორმაციით, მოწყობილობებს შორის იყო ისეთი ტექნიკა, რომელიც შესაძლოა სათვალთვალოდ და ჯაშუშური საქმიანობისთვის ყოფილიყო განკუთვნილი.

31 წლის ალექსანდრ კრუგლიანსკი და 42 წლის ალექსანდრა კრუგლიანსკაია 23 სექტემბერს დააკავეს. მონტენეგროს პოლიციის განცხადებით, საზღვრისა და საბაჟოს თანამშრომლებმა მათი ბარგის შემოწმებისას აღმოაჩინეს 26 210 ევრო, 1 150 ისრაელის შეკელი, დიდი რაოდენობით დაუდეკლარირებელი ელექტრონული მოწყობილობები და სხვადასხვა მედიკამენტი. ასევე ამოიღეს რამდენიმე საკომუნიკაციო მოწყობილობა. წყვილს კონტრაბანდასა და ფულის გათეთრებაში ედებათ ბრალი.

Vijesti-ს ცნობით, ელექტრონული მოწყობილობები 19 ჩემოდნიდან 17-ში აღმოაჩინეს. პოლიციის მიერ გავრცელებულ ფოტოებზე ჩანს BugHunter Professional BH-04-ის რადიოსიგნალის დეტექტორი, სათვალთვალო კამერები, კომპიუტერული კომპონენტები, მონაცემთა შესანახი მოწყობილობები, კაბელები და მიკროფონიანი GPS-ტრეკერი რუსულენოვანი წარწერით.

დაკავების შემდეგ პოლიციამ ბუდვაში, საცხოვრებელი კორპუსის მეორე სართულზე მდებარე ბინა გაჩხრიკა, რომელსაც წყვილი იყენებდა. ჩხრეკა 12 საათზე მეტხანს გაგრძელდა. სამართალდამცველებმა აღმოაჩინეს რვა ვალუტაში დაახლოებით 1 მილიონი ევროს ღირებულების ნაღდი ფული — ევრო, რუსული რუბლი, სერბული დინარი, ისრაელის შეკელი, თურქული ლირა, არაბთა გაერთიანებული საამიროების დირჰამი, აშშ-ის დოლარი და ყირგიზული სომი. პოლიციამ ასევე ამოიღო პოლიგრაფი, საკომუნიკაციო მოწყობილობები, დიდი რაოდენობით ელექტრონული ტექნიკა და 1 120 ევრო, რომელიც, მათი ვარაუდით, ყალბი იყო. ამოღებული ნივთები ექსპერტიზაზე გაიგზავნება.