სოციალური სამართლიანობის ცენტრის (SJC) შეფასებით, კახა კალაძის შტაბთან გაკეთებული წარწერისთვის დაკავებული აქტივისტის, მეგი დიასამიძის წინააღმდეგ სისხლისსამართლებრივი დევნა სახიფათო პრეცედენტია, რომლის მიზანიც აშკარაა, რომ "ემსახურება არა სამართლებრივი წესრიგის დაცვას, არამედ მოქალაქეთა პოლიტიკური აქტივიზმის შეზღუდვასა და რეპრესიას". ამის შესახებ ორგანიზაციამ განცხადება მანამდე გააკეთა, ვიდრე პროკურატურა 23 წლის სტუდენტს ბრალს წარუდგენდა.

SJC უწყებას მოუწოდებდა მეგი დიასამძის სისხლის სამარლებრივი დევნა არ დაეწყო.

ორგანიზაციის განცხადებით, საქმეში სისხლის სამართლის კანონით გათვალისწინებული ქმედება არ არსებობს.

SJC-ის განცხადებით, ადმინისტრაციული პასუხისმგებლობის დაკისრებისთვის, საარჩევნო კოდექსი პასუხისმგებლობას მხოლოდ მაშინ ითვალისწინებს, თუ ბანერი დაზიანდა, ხოლო "როგორც გავრცელებულ კადრებში ჩანს ბანერი არ დაზიანებულა და მისი გაწმენდა მალევე მოხერხდა, რაც გამორიცხავს ადმინისტრაციულ პასუხისმგებლობასაც კი".

"10 სექტემბერს შინაგან საქმეთა სამინისტრომ გაავრცელა ინფორმაცია, რომ 8 სექტემბერს მელიქიშვილის გამზირზე მოქალაქეებს შორის მომხდარი დაპირისპირების ფაქტთან დაკავშირებით, მიმდინარე გამოძიების ფარგლებში სამი პირი დააკავა, მათ შორის სხვისი ნივთის დაზიანების ფაქტზე 23 წლის სტუდენტი, მეგი დიასამიძე.

როგორც მოგვიანებით მეგი დიასამიძის ადვოკატმა განაცხადა, მას 9 საათის განმავლობაში არ ეძლეოდა ადვოკატთან კომუნიკაციის საშუალება. მისი თქმით, დიასამიძეს მთელი პერიოდის განმავლობაში ხელები ზურგს უკან ჰქონდა შეკრული და "მიუხედავად იმისა, რომ ითხოვა ბორკილების მოშვებას ან ხელების წინ გადმოტანას, მას დამცინავი ტონით ეუბნებოდნენ, რომ ნაკლები ემოძრავა და ხელები აღარ ეტკინებოდა".

სისხლის სამართლის კოდექსის 187-ე მუხლი, რომლის საფუძველზეც მეგი დიასამიძის მიმართ გამოძიება დაიწყეს, სისხლისსამართლებრივ პასუხისმგებლობას ითვალისწინებს სხვისი ნივთის დაზიანებისთვის ან განადგურებისთვის, რამაც მნიშვნელოვანი ზიანი უნდა გამოიწვიოს. მნიშვნელოვან ზიანი ამ მუხლის მიზნებისთვის სახეზეა, თუ ნივთის ღირებულება 150 ლარს აღემატება.

მედიაში გავრცელებულ კადრებში ჩანს, რომ კახი კალაძის ბანერზე გაკეთებული წარწერა: "რუსული ოცნება", იშლება, ქართული ოცნების შტაბის წევრები მალევე შლიან და ნათლად ჩანს, რომ ბანერი დაზიანებული არ არის.

ხაზგასასმელია, რომ ბანერის დაზიანებისთვის პასუხისმგებლობას, სპეციალური კანონი ითვალისწინებს, რომელიც უშუალოდ მიემართება სააგიტაციო მასალას, რაც სრულად გამორიცხავს სისხლისსამართლებრივ პასუხისმგებლობას აღნიშნული ქმედებისთვის და კიდევ ერთხელ ხაზს უსვამს ბრალის აბსურდულობას და აქტივისტის "სამაგალითოდ დასჯის" პოლიტიკურ დაინტერესებას.

ადმინისტრაციული პასუხისმგებლობის დაკისრებისთვის, საარჩევნო კოდექსი პასუხისმგებლობას მხოლოდ მაშინ ითვალისწინებს, თუ ბანერი დაზიანდა, ხოლო როგორც გავრცელებულ კადრებში ჩანს ბანერი არ დაზიანებულა და მისი გაწმენდა მალევე მოხერხდა, რაც გამორიცხავს ადმინისტრაციულ პასუხისმგებლობასაც კი.

მეგი დიასამიძისთვის ამ ეტაპზე ბრალი ჯერ არ წაუყენებიათ, შესაბამისად სოციალური სამართლიანობის ცენტრი მოუწოდებს საქართველოს პროკურატურას დაუყოვნებლივ შეწყვიტოს მეგი დიასამიძის მიმართ დაწყებული გამოძიება და არ დაუშვას მის მიმართ სისხლისსამართლებრივი დევნის დაწყება, სისხლის სამართლის კანონით გათვალისწინებული ქმედების არარსებობის გამო.

მეგი დიასამიძის წინააღმდეგ სისხლისსამართლებრივი დევნის დაწყება
შექმნის სახიფათო პრეცედენტს, რომლის მიზანიც აშკარაა, რომ ემსახურება არა სამართლებრივი წესრიგის დაცვას, არამედ მოქალაქეთა პოლიტიკური აქტივიზმის შეზღუდვასა და რეპრესიას.

საქართველოში ადამიანის უფლებათა კრიზისმა უმძიმესი ფორმები მიიღო და ქვეყანაში ყოველდღიურად იზრდება ძალადობის, საპოლიციო თვითნებობის, პოლიტიკური ნიშნით დაკავებული პირების რაოდენობა, რაც ავტორიტარიზმისკენ აგრესიული შემობრუნების კიდევ ერთი საგანგაშო სიგნალია," — წერია სოციალური სამართლიანობის ცენტრის განცხადებაში.