"ოცნების" ხელისუფლების დანიშნული პრეზიდენტი, მიხეილ ყაველაშვილი ამერიკელი ჩარლი კირკის მკვლელობას სოციალურ ქსელში გამოეხმაურა. მისი თქმით, ჩარლი კირკი არის ლიბერალური ფაშიზმის მორიგი მსხვერპლი.

"შემზარავია ჩარლი კირკის მკვლელობა, რომელიც ცალსახაა, უკავშირდება მის კონსერვატიულ შეხედულებებს, ფსევდოლიბერალური იდეოლოგიის კრიტიკას და ლგბტ პროპაგანდის წინააღმდეგ ბრძოლას. ჩარლი კირკი არის ლიბერალური ფაშიზმის მორიგი მსხვერპლი. კიდევ უფრო შემზარავია ის ცინიკური შეფასებები, რაც ფსევდოლიბერალური იდეოლოგიის მიმდევრებს აქვთ ამ საშინელი ფაქტის მიმართ. ჩარლი კირკის მკვლელობის თანამონაწილეა ყველა ის ადამიანი, რომელიც ახალისებს ძალადობას, მიუღებელი აზრის დევნას და ცდილობს დანერგოს და გაავრცელოს თავსმოხვეული, მახინჯი იდეოლოგია. გამძლეობას ვუსურვებ ჩარლი კირკის ოჯახს და ახლობლებს", — დაწერა ყაველაშვილმა.

ცნობისთვის, ამერიკის შეერთებული შტატების კონსერვატორი აქტივისტი, პრეზიდენტ დონალდ ტრამპის გავლენიანი მოკავშირე, ჩარლი კირკი, ოთხშაბათს იუტას უნივერსიტეტში სიტყვით გამოსვლისას სასიკვდილოდ დაჭრეს.

ჩარლი კირკი მოკლეს — დამნაშავეს ჯერ კიდევ ეძებენ